20:12 Bazar Günü, 24 Mart 2019
GƏNCLİK

Fəxrəddin Həsənzadə: "Cənab Prezidentin “Real TV”-yə müsahibəsi gənclər siyasətinin strateji hədəflərini bir daha müəyyən etdi"

14:48, 13.02.20192974
Fəxrəddin Həsənzadə:
"Ötən gün cənab İlham Əliyevin "Real TV”-yə müsahibəsində ölkəmizdə həyata keçirilən gənclər siyasətinə geniş yer verilməsini gələcəyə hesablanan strategiyanın anonsu kimi qiymətləndiririk. Xüsusən çıxışda könüllülük hərakatının geniş vüsət alması, özəl və dövlət sektorunda bu ənənənin davam etdirilməsi ilə bağlı tövsiyyələri yaxın aylarda könüllülük prinsiplərinin əhatə dairəsini artıracaqdır. Sözsüz ki, digər verilən qərarlar kimi bu addım da birmənalı olaraq gənclərin vətəndaş cəmiyyətində iştirakçılığının artırılması ilə yanaşı, onların ictimai nəzarət funksiyasını genişləndirəcəkdir" - Bu sözləri prezidentin Real TV-yə son müsahibəsi ilə bağlı olaraq AZXEBER.COM-a açıqlama verən Gənclər üçün Təhsil Mərkəzinin icraçı direktoru Fəxrəddin Həsənzadə deyib.

O bildirib ki, könüllük hərəkatı bacarıqlı gənclərə yeni imkanlar yaradacaq: "Təsadüfi deyil ki, bəzən ali təhsilini başa vuran gənclər sonradan iş üçün müraciət etdikləri zaman təcrübə tələb olunması ilə qarşılaşırlar və bu onlarda ruh düşkünlüyü yaradır. Məhz könüllülüyün bütün sahələrdə təbliğinə dair cənab Prezidentin tövsiyəsi gənclərin maraq və ixtisas dairəsinə uyğun olaraq müxtəlif qurumlarda təcrübə keçməsinə böyük şərait yaradacaq. Belə ki, artıq dövlət və özəl qurumlar bacarıqlı gənclərlə birbaşa iş mühitində tanış olacaq, onlara gərəkli olan kadr potensialının təmin olunmasında həmin gənc könüllülərdən faydalanacaqlar. Bu da özlüyündə bütün istiqamətlər üzrə gənclərin praktiki biliklərinin artırılması ilə bərabər insan kapitalının inkişafına ibtidai mərhələdə töhfə verəcək".
 
Fəxrəddin Həsənzadə rəhbəri olduğunu təşkilatın görəcəyi işlərdən də danışıb:

"Azərbaycan Respublikasının Prezidentinin İctimai-siyasi məsələlər üzrə köməkçisi cənab Əli Həsənovun dövlət və özəl orqanlarda könüllülük fəaliyyətinin təbliğ edilməsi ilə bağlı çağırışına əsaslanaraq Gənclər üçün Təhsil Mərkəzi fəaliyyət göstərdiyi 6 regional ofisində geniş tədbirlər planı həyata keçirəcəkdir. Yaxın günlərdə regionlarda könüllülərin iştirakı ilə böyük toplantı və forumların keçirilməsi ilə yanaşı, tərəfimizdən dövlət və özəl orqanlarda könüllülük işinin təşkili, həmin qurumların daxilində könüllülər qrupunun yaradılması, habelə könüllülərin cəlb edilməsi ilə bağlı maarifləndirici görüşlərə start verəcəyik. Bu missiya özlüyündə region gənclərinin şəxsi inkişafı ilə yanaşı, gələcək məşğulluq  probleminin həllində açar rolunu oynayacaqdır".

O gənclər təşkilatlarına da çağırış edib: "Bütün bu deyilənləri nəzərə alaraq, könüllülük prinsiplərini həyat tərzinə çevirən gənclər təşkilatlarını, bu sahədə böyük təcrübəsi olan qeyri-hökumət təşkilatlarını bu qürurlu və sabaha hesablanan missiyanın həyata keçirilməsində yaxından və aktiv iştirak etməyə çağırırıq. Bu sadəcə könül işi deyil, həmçinin bizlər üçün ideologiyadır".  
 
AZXEBER.COM 

XƏBƏR LENTİ