05:46 çərşənbə, 16 Oktyabr 2019
MƏDƏNİYYƏT

“Mənə dünyanı çək” adlı rəsm sərgisi keçirilib

17:47, 03.06.20195670
“Mənə dünyanı çək” adlı rəsm sərgisi keçirilib
1 iyun - Uşaqların Beynəlxalq Müdafiəsi günü münasibətilə "Mənə dünyanı çək” adlı rəsm müsabiqəsinin yekunu ilə bağlı sərgi keçirilib.

AZXEBER.COM-un məlumatına görə, "Liatris Holding”in təşkilatçılığı ilə baş tutan müsabiqəyə Mədəniyyət Nazirliyi və Azərbaycan Rəssamlar İttifaqı dəstək olub.

Sərgiyə 150-dən artıq əsər təqdim edilib. Münsiflər heyətində Mədəniyyət Nazirliyinin təsviri incəsənət şöbəsinin əməkdaşı Anar Qurbanov, Azərbaycan Rəssamlar İttifaqının katibi, xalq rəssamı Ağəli İbrahimov, "Liatris Holding”in rəhbəri Ruhi Əliyeva, əməkdar incəsənət xadimi, modelyer Fəxriyyə Xələfova, Xalq artisti Fidan Hacıyeva və rəssam Milena Nəbiyeva yer alıblar.

Aparıcılığını Azər Süleymanovun etdiyi tədbirdə ilk olaraq Ruhi Əliyeva çıxış edib. O, münsiflərə təşəkkürünü bildirərək, təqdim olunan rəsm əsərlərindən danışıb:

"Münsiflərimizin işləri çox olsa da, bizi bu müsabiqədə tək qoymadılar. Çox maraqlı mövzularda rəsmlər təqdim olundu. Bəzi ailələr övladının rəqqasə, sənətçi olmağından çəkinir. Hətta şahidi olmuşam ki, valideynlər uşağın rəssam olmasına imkan yaratmayıblar. Uşaqları bu istəklərdən çəkindirməyin. Onlara dəstək olun. Müsabiqəmizin məqsədi də uşaqların incəsənət sahəsində istedadlarını üzə çıxarmaqdır. Çox rəsmlər gəldi, hamısını bir-bir izlədik".

Xalq rəssamı Ağəli İbrahimov müsabiqəyə təqdim edilən əsərlərin mövzusundan söz açıb:

"Çox gözəl bir iş ortaya qoyulub. Dünyanın ən önəmli varlıqlarını sevindirdik. Hər bir əsər maraqlıdır. Həm bizim qəhrəmanlarımızın, tarixi şəxsiyyətlərimizin rəsmləri, həm də başqa dövlətlərin tarixi ilə bağlı hadisələrin əks olunduğu əsərlər var".


Tədbirdə çıxış edən millət vəkili Qənirə Paşayeva rəsm əsərlərinin dəyərindən danışıb və uşaqları bayram münasibətilə təbrik edib.

Azərbaycan Mili İncəsənət Muzeyində baş tutan sərgi-müsabiqəyə təqdim olunan əsərlər 5-10 və 11-15 yaş kateqoriyalarına əsasən qəbul edilib.

Sərbəst mövzuda çəkilən rəsmlərin müəllifləri - 1-ci yerin sahibi 500 AZN, 2-ci yerin sahibi 300 AZN, 3-cü yerin sahibi isə 200 AZN pul mükafatına, diplomlara layiq görülüblər. Tədbirə qatılan bütün uşaqlara hədiyyələr verilib.
XƏBƏR LENTİ