Xəbər verdiyimiz kimi, mayın 10-da Azərbaycan Respublikasının Prezidenti İlham Əliyev və birinci xanım Mehriban Əliyeva Ağdam Muğam Mərkəzinin açılışında iştirak ediblər.
AZXEBER.COM xəbər verir ki, açılışda iştirak edən mədəniyyət naziri Adil Kərimli dövlətimizin başçısına və birinci xanıma burada yaradılan şərait barədə məlumat verib.
Ağdam Muğam Mərkəzinin təməli 2023-cü ilin mayında Prezident İlham Əliyev və birinci xanım Mehriban Əliyeva tərəfindən qoyulub.
Mərkəzdə kafe, kinozal, kitabxana və iki rəqs zalı yaradılıb. Buradakı 507 yerlik konsert zalında müxtəlif mədəni tədbirlər, o cümlədən muğam konsertləri təşkil etmək üçün hərtərəfli şərait var. Mərkəzdə 15 dərs otağı, sərgi salonu, iclas zalı və digər otaqlar yaradılıb.
Muğam Mərkəzinin ərazisində 615 tamaşaçı tutumu olan açıq amfiteatr da inşa edilib.
Mərkəz Qarabağ bölgəsində qədim muğam sənəti incisinin işğaldan əvvəlki şöhrətinin bərpası, tədrisi və təbliğində, gənc nəsildə muğama sevginin aşılanmasında mühüm rol oynayacaq.
Prezident və xanımı Muğam Mərkəzinin açılışında iştirak edən bir qrup incəsənət xadimi və sənətçilər ilə görüşüblər.
Muğam ifaçıları İlham Əliyev və Birinci Xanım Mehriban Əliyevanı "Qarabağ" mahnısının canlı sədaları altında qarşılayıblar.
Ağdamda tarixi anlara şahidlik edən Xalq artist Mələkxanım Eyyubova Prezidentin sənət adamları ilə səmimi görüşünün ardından yaşadığı hissləri AZXEBER.COM-la bölüşüb:
"Bu təkcə biz sənət adamlarının yox, ümumilikdə Azərbaycan xalqının sevincidir. Çünki bizim işğaldan azad olunan torpaqlarımızda çox gözəl işlər gedir. İşğaldan azad edilən torpaqlarda belə mərkəzlərin açılması o deməkdir ki, artıq o torpaqlarda hər zaman muğam səsi gələcək. İnsanlar öz torpaqlarına qayıdacaq və o yurdda "Qarabağ şikəstəsi" səslənəcək.
Xalq artisti deyib ki, Ağdam Muğam Mərkəzində hər cür şərait yaradılıb:
"Bir neçə il bundan öncə Şuşaya gedəndə yollar narahat idi, çətinliklə getmək olurdu. Amma bu il çox rahat şəkildə Xankəndiyə, Laçına getdik. Çünki ildə-ilə o torpaqlar daha da çiçəklənir, inkişaf edir. Hər gedəndə orada yeniliklərin şahidi oluruq. Ağdam Muğam Mərkəzinin açılışı da tarixi hadisə olaraq yadda qaldı. Çox möhtəşəm, əzəmətli, böyük tutumlu bir mərkəzdir. Geniş səhnəsi, böyük konsertlər üçün hər bir şəraiti var".
Mələkxanım Eyyubova Prezident və xanımının qarşısında canlı ifa etdiyi muğam haqda da danışıb:
"Bu Prezidentimiz mərkəzdən çıxan zaman baş verdi. Planlanmış heç bir şey yox idi. Hər şey təbii və içimizdən gəldiyi kimi oldu. Biz sənət dostlarımla hamımız bir ağızdan "Qarabağ" mahnısını ifa etməyə başladıq. İlham Əliyevin gözləri dolmuşdu, çox gözəl hisslərlə bizi dinləyirdi. Mahnının sonunda mənim muğam oxumağım planlanmamış da olsa, mən onu içimdən gəldiyi kimi ifa etdim. Prezidentimizin çox zamanını almaq istəmədik, o səbrlə, qürurla hər bir vətəndaşı və sənət adamını dinləyirdi, qayğı göstərirdi. Həqiqətən də Ağdam Muğam mərkəzinin açılışı tarixi hadisə olaraq yaddaşlarda qalacaq. Allah xalqımıza hər zaman belə şad günlər qismət eləsin"
Günel Hüseynli
Yazı Medianın İnkişafı Agentliyinin "Azərbaycanın dövlətçilik tarixinin, milli adət-ənənələrinin, elm və mədəniyyətinin təbliği" mövzusunda dərc edilib.
