AFFA-nın İntizam Komitəsi “Xəzər Lənkəran” klubunun əsas komandasının Unibank Premyer Liqasında topladığı xallardan 6-nın silinməsinə dair qərar çıxarıb.
AZXEBER.COM-un AFFA-nın rəsmi saytına istinadən verdiyi məlumata görə, bu qərar FİFA-nın Nizam-İntizam Komitəsinin 30 oktyabr 2011-ci il tarixli qərarının 3-cü hissəsinin 4-cü bəndinə və FİFA-nın Nizam-İntizam Komitəsinin 29 mart 2012-ci il tarixli təlimat məktubuna əsasən verilib.
Həmin bənddə göstərilib ki, müəyyən müddət ərzində borc ödənilmədiyi təqdirdə futbolçunun tələbinə əsasən klubun əsas komandasından təxirə salınmadan 6 xal çıxılmalıdır. Xalların çıxılması yerli assosiasiya tərəfindən həyata keçirilməlidir. İntizam Komitəsi AFFA-nın bayrağı altında keçirilən bütün yarışlarda çıxış edən klubların nəzərinə çatdırılır ki, analoji hadisə ilə qarşılaşmamaları üçün FİFA, UEFA, AFFA və Lisenziyalaşdırmanın bütün tələbləri yerinə yetirilməlidir. bu qərardan sonra “Xəzər Lənkəran” 45 xalla 4-cü pilləyə enib. “Neftçi” 57 xalla 1-ci pillədə qalıb və ardıcıl 2-ci çempionluğa daha da yaxınlaşıb. “Qarabağ” 50 xalla 2-ci, “İnter” 49 xalla 3-cü pilləyə yüksəlib. Digər tərəfdən, 42 xala malik “Qəbələ” və 41 xalı olan “Bakı”nın 4-cü pillədəki “Xəzər Lənkəran”la xal fərqi azalıb.
