Bununla onlar Kəlbəcərin işğalın 18-ci ildönümü günü Yaponiya səfirliyində zəlzələdən zərər çəkmiş həyaşıdlarının dərdinə şərik olduqlarını nümayiş etdirmək istəyirlər.
Gənclər Təşkilatları Milli Şurası (ARGTMŞ) ilə Parlament Jurnalistləri Birliyinin dəstəyilə keçirilən tədbirin məqsədi məhz Kəlbəcərin işğal günüdə həmin rayondan olan uşaqların Yaponiyada baş vermiş təbii fəlakət nəticəsində öz ölkələrində faciə yaşayan yapon həmyaşıdlarına dəstək olmaqdır. ARGTMŞ sədri Fuad Muradov bildirib ki, 19 ildir Kəlbəcərdən olan insanlar köçkün həyatı yaşayırlar: “Bu uşaqlar da faciə ilə üzləşiblər. Odur ki, bu gün Yaponiyada olan həmyaşıdlarına dəstək vermək üçün bura gəliblər. Ermənistanın ölkəmizə təcavüzü nəticəsində öz yurd-yuvalarından didərgin düşən bu uşaqlar faciə nəticəsində zərər çəkən yaponiyalı uşaqların dərdinə şərik olurlar”.
Yaponiyanın Azərbaycandakı səfiri Suşuke Vatanabe isə deyib ki, belə bir gündə bu uşaqların Yaponiyada baş verən təbii fəlakət nəticəsində həlak olan həmyaşıdlarına dəstək olması yüksək qiymətləndirilir. Azərbaycan xalqının səmimi qəlbini daha dərindən hiss etdiyini söyləyən səfir Yaponiyanın da hazırda çox ağır günlər keçirdiyini söyləyib: “Yaponiyada təbii fəlakət baş verən günlər ərəfələrində Azərbaycan yaponlara 1 milyon dollar miqdarında ianədə bağışlayıb. Həm Azərbaycan hökuməti tərəfindən, həmçinin bu gün uşaqların məktubu və yığdıqları pul məni çox təsirləndirdi. Mən bu pulu və köçkün uşaqların məktublarını mütləq Yaponiyaya göndərəcəyəm. Azərbaycanın bu dar gündə Yaponiyaya öz dost, yardım əlini uzatması bizim üçün çox əhəmiyyətlidir”.
Xatırladaq ki, məktəblilər yapon həmyaşıdlarına yazdıqları məktublarını və onlara dövlət tərəfindən verilən 1 aylıq müavinətlərini (çörək pullarını) Yaponiyada yaşayan uşaqlara çatdırmaq üçün səfirə təqdim ediblər.
