AzeDer (Azərbaycan Təhsil, Mədəniyyət və Yardımlaşma Dərnəyi) 2013-cü ilin may ayından etibarən Avropanın və Türkiyənin müxtəlif universitetlərində təhsil almaqda olan tələbələrə Avropa Parlamentində təcrübə keçmək imkanı yaratmaqdadır.
Təcrübə proqramının müddəti 3 aydır və müddət ərzində azərbaycanlı tələbələr Avropa Parlamentinin qanunvericilik prosesi ilə yaxından tanış olur, parlamentin komitə iclaslarında müşahidəçi qismində iştirak edir və onların işinə rəhbərlik edən AP üzvlərinin, eləcə də onların üzvü olduqları siyasi partiyaların fəaliyyətini yaxından izləmək imkanı əldə edirlər.
Bu proqram öz növbəsində həmçinin yüksək ranqlı Avropa siyasətçiləri ilə gündəlik təmasda olmaq, onlarla Azərbaycan Respublikasının xarici siyasət kursunu müzakirə etmək, eləcə də onun problemlərini qabartmaq üçün müstəsna bir imkan yaratmaqdadır.
Xatırladaq ki, cari ilin sentyabr və noyabr aylarında da növbəti seçim mərhələsini müvəffəqiyyətlə tamamlamış azərbaycanlı gənclər təcrübə proqramında iştirak üçün Belçika Krallığının paytaxtı Brüsselə yola düşəcək.
Qeyd edək ki, AzeDer “Beynəlxaq Təcrübə Proqramları” layihəsini bir çox beynəlxalq quruluş və şirkətlərlə həyata keçirdir və xaricdə təhsil alan azərbaycanlı tələbələrlə yanaşı artıq eyni zamanda gənc dövlət qulluqçularımız da bu layihədə iştirak edəcək.
Bu istiqamətdə ilk addım olaraq Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi (“ASAN xidmət”) ilə AzeDer arasında aprelin 26-da təcrübə proqramlarında iştirak haqqında əməkdaşlıq memorandumu imzalanmışdır.
AzeDer-in sədri Rəşad Abdullayev isə öz növbəsində bildirmişdir ki, Azərbaycanın gələcəyi naminə dəyərli kadrların yetişdirilməsi üçün AzeDer-in həyata keçirdiyi “Beynəlxaq Təcrübə Proqramları” layihəsi mühüm rol oynamaqdadır və bu layihə “qara qızılın insan kapitalına çevrilməsi” strategiyasına töhfədir.
İzlədiyiniz video görüntüdə də Avropa Parlamenti üzvlərinin bizim layihəmiz və gənclərimiz haqqında düşüncələrini görürük ki, bu bizim üçün çox sevindirici haldır.
AzeDer 2013-cü ildə təsis edilib, baş qərargahı İstanbulda yerləşən təhsil, mədəniyyət və həmrəylik adına Azərbaycan üçün çalışmağı qarşısına məqsəd qoymuş ünsiyyət və fəaliyyət məkanı olan azərbaycanlı gənclərin platformudur.
Təşkilat azərbaycanlı gənclərin Azərbaycanın maraqlarına, gələcəyinə töhfə verməsi və bununla yanaşı, gənclərin özünü inkişaf etdirə bilməsi üçün qurulmuş olan bir təşkilatdır.
