“1915-ci ildə Osmanlı təbəəsi olan ermənilər türklərə xəyanət etmişdilər və Türkiyəni parçalamaq niyyəti güdən Rusiyanın agenti idilər” “Ermənilərin Azərbaycan torpaqlarını işğal etməsi nəticəsində öz evlərini tərk etməyə məcbur olmuş Azərbaycan xalqına səmimi qəlbdən yazığım gəlir. Lakin mən Rusiya, Avropa və ya ABŞ-ın Ermənistana işğalı dayandırmaq üçün təzyiq göstərməyə çalışdığını görmürəm”. APA-nın məlumatına görə, bu fikirləri Stokholmda məruzələrlə çıxış edən Luevil Universitetinin professoru, amerikalı analitik Castin MakKarti deyib. Azərbaycanlı və türk icmalarının nümayəndələrinin iştirak etdiyi tədbirlərdə amerikalı professor Türkiyənin şərqində müsəlman və xristian əhalinin ölümü ilə nəticələnən 1915-ci il hadisələri barədə danışıb. Onun sözlərinə görə, I dünya müharibəsi dövründə Osmanlı imperiyasının təbəələri olan ermənilər türklərə xəyanət edib və Türkiyənin parçalamaq istəyən Rusiya imperiyasının casusları olublar. Professor bu agentlərin Türkiyənin şərq hissəsində, Van gölü ətrafında, İranla sərhəddə məskunlaşdığını, oradan Rusiyaya keçə bilmək və Rusiya ordusuna xidmət etmək imkanlarının olduğunu deyib. MakKarti qeyd edib ki, Türkiyənin o bölgələrdə yaşayan müsəlman əhalisinin 2/3 hissəsi erməni silahlıları tərəfindən öldürülüb.
