Ötən il Azərbaycanda keçirilən buraxılış imtahanları nəticəsində 9-cu və 11-ci siniflərin şagirdləri arasında nəinki minimal tədris proqramını mənimsəməyənlər, hətta oxumağı və yazmağı bacarmayanlar da aşkar olunub. Tələbə Qəbulu üzrə Dövlət komissiyasından APA-ya verilən xəbərə görə, belələri 11-ci sinif şagirdləri arasında 5 nəfər, 9-cu sinif şagirdləri arasında isə 44 nəfər olub: “Bustatistika imtahan rəhbərlərinin protokolları əsasında ortaya çıxıb. Bu cür halların imtahan protokollarında heç də həmişə qeyd olunmadığını nəzərə alsaq, yuxarıda göstərilən faktların əslində daha çox olduğunu və vəziyyətin daha acınacaqlı olduğunu ehtimal etmək olar. Belə şagirdlərin hansı bilik və bacarıqlar sayəsində 9-cu, hətta 11-ci sinfə qədər gəlib çatması bizim üçün müəmmalı olaraq qalır”.
11-ci siniflər üzrə oxumağı və yazmağı bacarmayan şagirdlərin rayonlar (şəhərlər) üzrə sayı belədir: Şəmkir, Gədəbəy, Ağstafa, Goranboy və Kürdəmir rayonlarının hərəsində 1 nəfər.
9-cu siniflər üzrə isə oxumağı və yazmağı bacarmayan şagirdlərin sayı belədir: Sabirabad – 9 nəfər, Daşkəsən – 7 nəfər, Gədəbəy – 4 nəfər, Bərdə, Ağdaş, Salyan və Cəlilabad rayonlarının hərəsində 3 nəfər, Qobustan, Füzuli və Neftçala rayonlarının hərəsində 2 nəfər, Şəmkir, Tovuz, Göyçay, Kürdəmir, Ağdam və Beyləqan rayonlarının hərəsində 1 nəfər.
Buraxılış imtahanlarında həm 9-cu sinif, həm də 11-ci sinif şagirdləri arasında ən yüksək nəticələri türk liseylərinin və Təhsil Nazirliyi (TN) tabeli və özəl liseylərin şagirdləri əldə ediblər. 9-cu və 11-ci siniflər üzrə buraxılış imtahanlarında türk liseyləri şagirdlərinin bütün fənlər üzrə topladıqları orta bal müvafiq olaraq 45.3-ə və 48.9-a, TN tabeli və özəl liseylərin şagirdlərinin nəticələri isə müvafiq olaraq 39.5-ə və 44.7-yə bərabər olub.
9-cu siniflər üzrə buraxılış imtahanında bölgələr arasında ən yüksək nəticəni Naftalan, Sumqayıt, Naxçıvan, Bakı, Mingəçevir şəhərlərinin, Şahbuz, Qubadlı və Qax rayonlarının şagirdləri göstəriblər. Ən aşağı göstəricilər isə Daşkəsən, Saatlı və Sabirabad rayonlarının şagirdlərinə aid olub.
11-ci siniflər üzrə buraxılış imtahanında ən yüksək nəticəni Naftalan, Sumqayıt, Mingəçevir, Bakı şəhərlərinin, Qubadlı, Qax, Şahbuz rayonlarının və Naxçıvan şəhərinin şagirdləri əldə ediblər. Göründüyü kimi, 9-cu siniflər üzrə buraxılış imtahanında yüksək nəticə göstərən bölgələr 11-ci siniflər üzrə buraxılış imtahanında da, əsasən, yüksək nəticə əldə ediblər. Ən aşağı göstəriciləri isə Ağcabədi və Sabirabad rayonlarının şagirdləri nümayiş etdiriblər.
Qeyd edək ki, ötən il buraxılış imtahanlarında 203907 nəfər şagirdi iştirak edib. Onların 117275 nəfəri 9-cu, 86632 nəfəri isə 11-ci sinif şagirdləri olub.
