Məlum olduğu kimi, Tokio-2020 Yay Olimpiya Oyunlarında Azərbaycan idmançıları uğursuz nəticə göstərdilər. Yarışda mübarizə aparan 44 idmançıdan cəmi yeddisi medal qazana bildi.
Amma bu medallar arasında qızıl medal qazanan idmançımız olmadı.
Medalardan 3-ü gümüş, 4-ü isə bürünc idi.
Azərbaycan bu nəticə ilə 67-ci yerdə qərarlaşdı. Bu göstərici son 25 ilin ən uğursuz nəticəsidir.
Təbii ki, 44 idmançımızın təmsil olunduğu oyunda bu, çox zəif göstəricidir.
Bəs idman sahəsində bu cür nəticələr şanssızlıqdır, yoxsa tapşırıqların düzgün yerinə yetirilməməsinin nəticəsidir?
Azərbaycanda digər sahələr kimi idman sahəsi də hər zaman Prezidentin diqqəti altındadır.
İlham Əliyev bununla bağlı bir çox tapşırıq və göstərişlərini verib.
Ötən gün yeni təyin olunan Gənclər və İdman naziri Fərid Qayıbovu videoformatda qəbul edən Prezident İlham Əliyev bu məsələyə bir daha toxunub.
Prezident bildirib ki, federasiyalardakı vəziyyətlə bağlı təhlil aparılmalıdır:
"Tokio Olimpiya Oyunlarında gənc idmançılar medallar qazana bilmədilər, bu, çox ciddi təftiş edilməlidir. Klublardakı vəziyyətlə bağlı təhlil aparılmalıdır. Yəni, biz nəticə çıxarmalıyıq. Biz, əlbəttə, qələbələrlə fəxr edə bilərik. Ancaq çatışmazlıqlar da var və onlar aradan qaldırılmalıdır. Bu sahədə şəffaflıq tam təmin edilməlidir və bütün xoşagəlməz hallara qarşı ciddi mübarizə aparılmalıdır".
Yeni təyin olunan nazir Fərid Qayıbov isə inamlı açıqlamalarla diqqət çəkib. O, qeyd edib ki, idman strategiyası uğrunda çalışılacaq:
"Azərbaycan idmanının strategiyası müəyyənləşdiriləcək. İdman mütəxəssisləri ilə birlikdə biz bu strategiya istiqamətində çalışacağıq".
Nazir bildirib ki, bu strategiya "İdman haqqında” qanundan başlayaraq, professional idman növlərini, o cümlədən uşaqları və gəncləri, bütün idman sahələrini əhatə etməlidir:
"Gələcəkdə uşaq və gənclərin idmanla məşğul olması ilə bağlı ciddi planlarımız var. Bu planlar isə yaxın müddətdə açıqlanacaq”.
Prezidentin də qeyd etdiyi kimi, medallar qazananlar yalnız veteran idmançılardır. Xüsusən daha çox diqqət göstərilən gənc idmançılar isə uğursuz nəticələri ilə bizi məyus edir.
Mövzu ilə bağlı AZXEBER.COM-a idman mütəxəssisi Kənan Məstəliyev fikirlərini bildirib.
O, qeyd edib ki, aidiyyatı qurumlar Prezidentin çıxışından, tənqiddən nəticə çıxarmalıdırlar:
"Əvvəlcə onu qeyd edim ki, dövlət başçısının da bu məsələyə toxunması idmanın dövlət səviyyəsində diqqətdə saxlanılmasının göstəricisidir. Məsələ təkcə Olimpiyadada qazanılan medalların əyyarı yox, necə qazanılmasını, kimin qazanmasını görməsi çox vacibdir. Prezidentin bu məsələlərə diqqət etməsi bu sahədə ciddi problemin olmasından xəbər verir. Yeni gənclər və idman naziri, eləcə də digər aidiyyatı qurumlar bu çıxışdan, tənqiddən nəticə çıxarmalıdırlar".
Kənan Məstəliyevin sözlərinə görə, Azərbaycan idmanında struktur olaraq ciddi kadr islahatına ehtiyac var:
"Amma gənclərin bu sahədə uğursuz nəticələrinin isə fikrimcə, çox sadə izahı var. Azərbaycanda idman sistemində, strukturunda yer alan kadrların dövrü keçib. Yəni onlar yeniliklərə hazır deyillər. Müasir dövrün tələblərini qəbul etmək iqtidarında deyillər və buna qarşı çıxırlar. Ola bilər ki, bunu bilməyərəkdən edirlər. Amma mən düşünürəm ki, Azərbaycan idmanında struktur olaraq ciddi kadr islahatına ehtiyac var. Yeni, enerjili, gənclərin inkişafına şərait yaradan kadrlara ehtiyac var. Onlara bu şərait yaradılmalıdır ki, onlar gəlsinlər, çalışsınlar. Azərbaycan idmanının inkişafına mane olan məhz budur. 30 il əvvəl tətbiq olunan sistemlər o dövr üçün idi. İndi isə yeniliklər tətbiq olunmalıdır. Yeniyetmə, gənc nəsilə daha ciddi yanaşılmalıdır. İndikilər isə bunu dərk etmək istəmir və ancaq hazır olanlarla işləmək istəyirlər”.
Biz də ümid edirik ki, yeni nazir və yeni islahatlar ölkə idmanında inkişafa səbəb olacaq. Ölkədə gənc idmançıların uğurlu nəticələrinə sevinmək hər bir vətəndaşın istəyidir.
Aydın Nuri
