1 oktyabr tarixi hər il Beynəlxalq Qəhvə Günü kimi qeyd olunur.
AZXEBER.COM xəbər verir ki, bu gün ilk dəfə 2015-ci ildə Beynəlxalq Qəhvə Təşkilatı tərəfindən elan olunub.
Məqsəd yalnız qəhvə sevərləri bir araya gətirmək deyil, həm də qəhvə istehsalçılarına dəstək göstərməkdir.
Tarixi məlumatlara görə, qəhvə 15-ci əsrdə Yəməndə yayılmağa başlayıb və qısa zamanda Osmanlı imperiyasından Avropaya, oradan isə bütün dünyaya yayılıb. Qəhvə müxtəlif xalqların mədəniyyətində həm içki, həm də adət-ənənənin ayrılmaz hissəsi hesab olunur.
Qəhvə yalnız gündəlik içki deyil, eyni zamanda səhərin oyanış səsi, yorğun günün nəfəsi və dostluq söhbətlərinin səmimiyyətidir. Dünyanın ən məşhur qəhvə növləri isə espresso, cappuccino, latte və americanodur.
Son illərdə qəhvə mədəniyyəti sürətlə inkişaf edir, yeni kafelər açılır və gənclər arasında qəhvəyə maraq artır. Qəhvə diqqəti artırır, enerji verir, yaddaşı gücləndirir və tərkibindəki antioksidantlar ürək-damar sağlamlığına faydalıdır. Lakin onu həddindən artıq içmək məsləhət görülmür.
Şahanə Ziyad
