““Catel” operatorunun fəaliyyətini yenidən bərpa edəcəyi gözlənilmir". Bunu dünən jurnalistlərə açıqlamasında rabitə və informasiya texnologiyaları nazirinin müavini Elmir Vəlizadə bildirib. O qeyd edib ki, “Catel”i əvəzləyəcək hər hansı şirkətin yaradılması da nəzərdə tutulmur: “”Catel" operatorunun şəbəkəsində müəyyən dövrdə bir sıra texniki problemlər olub. Bu isə tədricən aradan qaldırılmaqdadır. Onu əvəzləyəcək hər hansı şirkətin yaradılması və ya “Catel”in başqa şirkətin tərkibinə verilməsi də nəzərdə tutulmur”.
Qeyd edək ki, bu ilin aprel ayının əvvəlində CATEL rabitə operatoru şəbəkəsindəki ciddi nasazlıq CDMA standartı üzrə işləyən telefon sahiblərinin (417, 418 və 415 indeksli nömrələr, eləcə də Fonex şəbəkəsi - 040 zona şifrəsi altında başlayan nömrələr) şəbəkədən ayrılmasına gətirib çıxarıb. Bir müddət əvvəl rabitə və informasiya texnologiyaları naziri Əli Abbasov CATEL-in Bakı Telefon Rabitəsi İstehsalat Birliyi (BTRİB) və “Azerfon” şirkətinin idarəçiliyinə verilə biləcəyini söyləmişdi. O, şirkətin fəaliyyətinin bərpa olunacağını da vurğulamışdı.CATEL MMC-nin sorğu-məlumat mərkəzindən “Yeni Müsavat”a bildirdilər ki, nazir müavininin söylədiyi xəbər doğru deyil: “Şirkətin nömrələri bir neçə aydır ki, texniki nasazlıq üzündən fəaliyyətini dayandırıb. Ancaq şirkət hazırda fəaliyyət göstərir. Nömrələrin nə vaxt açıqlanacağı dəqiq bilinmir”. Bildirək ki, CATEL şəbəkəsinin abonentlərinin ümumi sayı isə 100 mindən çoxdur. Yaranan problem nəticəsində aylardır ki, şirkətin abunəçiləri öz telefonlarından istifadə edə bilmir. “İstehsalçı hüquqlarının müdafiəsi haqqında” Qanunun müvafiq maddəsinə əsasən, istehlakçı onun tələbatını ödəməyən məhsulu geri qaytara bilər. Hüquqşünas Müzəffər Baxışov deyir ki, əgər problem şirkətin günahı üzündən baş veribsə, o zaman istehlakçının məhkəməyə müraciət etmək hüququ var: “Problem texniki məsələ ilə bağlıdırsa, buna görə şirkət məsuliyyət daşıyır”.Azad İstehsalçılar Birliyinin sədri Eyyub Hüseynov da bildirir ki, aylardır CATEL istehlakçıların hüquqlarını pozur: ““İstehlakçı Hüquqlarının Müdafiəsi Haqqında” Qanunun müvafiq maddəsinə əsasən istehlakçı onun tələbatını ödəməyən məhsulu geri qaytara bilər. Əgər şirkət fəaliyyətini dayandırıbsa, istehlakçıya kompensasiya ödənilməlidir".
