Bu ilin yanvar-sentyabr ayları ərzində Səhiyyə Nazirliyinin Kliniki Tibbi Mərkəzinə dərmanların verdiyi allergik reaksiyalarla əlaqədar 87 nəfər müraciət edib.
Mərkəzin Toksikologiya şöbəsinin müdiri Azər Maqsudov bildirib ki, dərmanlardan zəhərlənmələrlə əlaqədar ölüm halları baş verməyib. Müraciət edənlər əsasən antibiotiklərdən zəhərləniblər. Sakitləşdirici, depressiya əleyhinə dərmanlar, vitamin qrupları və diş həkimlərinin istifadə etdikləri ağrıkəsicilər də xəstələrdə fəsadlı allergik reaksiyalar yaradıb.
A.Maqsudov bildirib ki, zəhərlənmələr daha çox insanların həkimlərin təyin etdiyi dozadan artıq və həkim məsləhəti olmadan, ev şəraitində dərman qəbul etməsi nəticəsində yaranıb.
Şöbə müdiri ötən ilin yanvar-sentyabr aylarında dərmanların verdiyi allergik reaksiyalarla əlaqədar mərkəzə 94 nəfərin müraciət etdiyini də xatırladıb.(TREND)
