Xəbər verdiyimiz kimi, aprelin 6-sı bir qrup xarici media nümayəndəsi cəbhə bölgəsinə səfər edib.
Cəbhəyanı ərazilərdə olan “Газетa.Ru” əməkdaşı Vladimir Derqaçev xüsusi reportaj hazırlayıb. Onun müşahidələrinə əsasən: “Azərbaycan yeganə ölkədir ki, Dağlıq Qarabağdakı gərginliyi Qafqazda sabitliyin pozulmasının təhlükəli amili hesab etmir. Bakı sakitdir və burada sərhəddə yaşanan qarşıdurmaların heç bir əlaməti yoxdur”.
Vladimir Derqaçev Tərtər və Bərdədə yerli sakinlərlə və cəbhədə gedən son əməliyyatlar zamanı şəhid olan gizir Nicat Bəhruz oğlu İsgəndərovun ailəsilə görüşüb. Jurnalist reportajında erməni işğalçılarının təxribatı nəticəsində yaralanan dinc sakinlərinin də adını çəkib və onların vəziyyəti ilə maraqlanıb.
Derqaçev Nicat İsgəndərovun yas çadırında şəhidin atası ilə həmsöhbət olub. Şəhid atası rusiya jurnalistlə görüşdə “Oğlum döyüşüb və həlak olub. Kişi kimi, əlində silahı ilə... O, azadlığımız və Azərbaycan torpağı uğrunda şəhid olub”, deyə açıqlama verib.
Vladimir Derqaçevun Tərtər və Bərdədən çəkdiyi fotoları təqdim edirik:
///“Qafqazinfo”
