Şəki Ağır Cinayətlər Məhkəməsində İsmayıllı rayonunda baş verən hadisələrdə təqsirləndirilən Tofiq Yaqublu, İlqar Məmmədov və digərlərinin məhkəməsi başlayıb.
AZXEBER.COM-un məlumatına görə, Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315.2-ci (hakimiyyət nümayəndəsinə zor tətbiq etmə və ya müqavimət göstərmə) maddələri ilə təqsirləndirilən Müsavat Partiyası başqanının müavini Tofiq Yaqublu, “REAL” hərəkatının sədri İlqar Məmmədov və digər təqsirləndirilənlərin məhkəməsi hakim Elxan Süleymanovun sədrliyi ilə keçirilir.Baş Prokurorluğun məlumatına görə, bu ilin yanvarın 23-də İsmayıllı şəhərində “Çıraq” otelinin inzibatçısı Emil Şəmdinovun və tanışı Elməddin Məmmədovun sərxoş vəziyyətdə xuliqanlıq etməsi səbəbindən hadisə yerində olan bir qrup şəxs tərəfindən “Çıraq” otelinin və müxtəlif markalı avtomobillərin yandırılması ilə nəticələnən kütləvi dava baş verib.İctimai qaydanın kobud surətdə pozulmasına görə, 52 nəfər saxlanılıb və məhkəmə tərəfindən onlardan 23-nə inzibati həbs, 15-nə inzibati cərimə növündə tənbeh tədbirləri tətbiq edilib, 14 nəfər isə xəbərdarlıq edildikdən sonra buraxılıb.Hüquqazidd əməllərinə görə Emil Şəmdinov və Elməddin Məmmədov cinayət məsuliyyətinə cəlb edilərək barələrində məhkəmə tərəfindən həbs-qətimkan tədbiri seçilib.
