ABŞ-da pop kralı Maykl Ceksonun ölümü ilə bağlı məhkəmə prosesi davam edir. Maykl Ceksonun şəxsi həkimi Konrad Myurreyin müğənnini bilməyərəkdən öldürməkdə ittiham olunduğu məhkəmə prosesində hər kəsi şoka salacaq addım atılıb. Prokuror Maykl Ceksonun ölümündən sonra çılpaq vəziyyətdə çəkilmiş şəkillərini nümayiş etdirib. Fotoşəkillər pataloqoanatom Kristofer Rocers ifadə verərkən dəlil qismində göstərilib. Kristofer Rocers deyib ki, Maykl Cekson 50 yaşında pis fiziki formada olmayıb, lakin bədənində çoxlu iynə izləri var. Onun sözlərinə görə, Maykl Cekosn özü ürəyinin dayanmasına səbəb olmuş propofol dozasını qəbul edə bilməzdi. Buna görə də müğənninin ölümü ilə bağlı şübhə şəxsi həkimi Konrad Myurreyin üzərində qalır. Kristofer Rocers Maykl Ceksonun propofolu həkiminin tualetdə olduğu 2 dəqiqə ərzində qəbul etdiyinə də inanmayıb: “Konrad Myurreyin Maykl Ceksona təhlükəsiz dozada propofol vermək üçün lazımi tibbi avadanlıqları da olmayıb. Həkim asanlıqla səhv edə və daha böyük dozada propofol verə bilər”.
Lent.az
