“Azərbaycan Respublikasının Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyinin vəsaitlərinin istifadəsi Qaydaları”nda dəyişikliklər edilib.
AZXEBER.COM-un Nazirlər Kabinetinin qərarına istinadən verdiyi xəbərə görə, dəyişikliyə əsasən, artıq Mərkəzi Bank nümayəndəsi Kənd Təsərrüfatı Nazirliyinin yaratdığı Kənd Təsərrüfatı Kreditləri üzrə Dövlət Agentliyinin vəsaitlərinin istifadəsi üzrə Müsabiqə Komissiyasının tərkibində olmayacaq.
“Azərbaycan Respublikasının Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyinin vəsaitlərinin istifadəsi Qaydaları”nın 1.4-cü bəndinin birinci abzasında “Azərbaycan Respublikası Mərkəzi Bankının” sözləri “Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının” sözləri ilə, ikinci abzasında “Maliyyə Nazirliyi və Mərkəzi Bankla” sözləri “Maliyyə Nazirliyi ilə” sözləri ilə əvəz edilib.
Bildirək ki, agentliyin təklifi əsasında layihələrin maliyyələşdirilməsi üçün regional strukturu və regional əhatəsi nəzərə alınmaqla, regionlar üzrə müvəkkil kredit təşkilatlarının seçilməsi Kənd Təsərrüfatı Nazirliyinin yaratdığı Kənd Təsərrüfatı Kreditləri üzrə Dövlət Agentliyinin vəsaitlərinin istifadəsi üzrə Müsabiqə Komissiyası tərəfindən qanunvericiliyə uyğun qaydada həyata keçirilir.
İndiyədək müsabiqə Komissiyasının tərkibinə Kənd Təsərrüfatı Nazirliyinin, İqtisadiyyat və Sənaye Nazirliyinin, Maliyyə Nazirliyinin, Mərkəzi Bankın və Agentliyin hər birindən 1 nəfər nümayəndə daxil edilirdi. Həmin komissiyanın tərkibinə Azərbaycanda aqrar bölmənin inkişafına maliyyə dəstəyi göstərən xarici və yerli qeyri-hökumət təşkilatlarının 2 nəfər nümayəndəsi də daxil edilə bilər.
Agentliyin vəsaitlərinin istifadəsi üzrə Müsabiqə Komissiyası haqqında Əsasnamə İqtisadiyyat və Sənaye Nazirliyi, Maliyyə Nazirliyi və Mərkəzi Bankla razılaşdırılmaqla Kənd Təsərrüfatı Nazirliyi tərəfindən təsdiq edilirdi. İndi isə Mərkəzi Bankın bu səlahiyyətləri ləğv edilib.
