Hərbi ekspert Üzeyir Cəfərov öz Feysbuk səhifəsində general Bağır Fətullayevin vəzifəsindən azad edildiyini yazıb.
AZXEBER.COM xəbər verir ki, hərbi ekspert onda olan məlumata görə Bağır Fətullayevin artıq ölkə ərazisini tərk etdiyini bildirib:
“Mətbuatın davamlı şəkildə işıqlandırdığı Rusiya Federasiyasının vətəndaşı, uzun müddət MN-də vacib posta sahib olan general-mayor Bağır Fətullayevlə bağlı mühüm qərar qəbul edilib. O, Silahlı Qüvvələrin Akademiyasındakı tutduğu vəzifəsindən azad edilib və onunla müqavilə müddəti bitdiyi üçün yeni müqavilə bağlanmayıb. Bildiyim qədər, rus generalı və son günə kimi Rusiya vətəndaşı kimi qalan B.Fətullayev artıq Azərbaycanı tərk edib və ailəsinin yaşadığı Sankt-Peterburq şəhərinə yola düşüb. Necə deyərlər, "do svidaniya, tovariş general".
Elə həmin SQ Hərbi Akademiyasında xidmət keçən polkovnik Seyran Qafarov da artıq tutduğu vəzifədən azad edilib və MN-də çalışmaq ona yasaqlanıb. Xatırladım ki, Seyran Qafarovun anasının erməni millətindən olması faktı adı çəkilən zabit tərəfindən rəsmi şəkildə etiraf edilmişdi”.
**
Müdafiə Nazirliyinin Mətbuat Xidməti Bağır Fətullayevlə bağlı yayılan informasiyaların ümumiyyətlə həqiqəti əks etdirmədiyini bildirib. Nazirlikdən axar.az-ın sorğusuna cavab olaraq bildirib ki, Bağır Fətullayev Azərbaycan Silahlı Qüvvələrində xidmət etməyib.
“Bəzi kütləvi informasiya vasitələrində yenidən Bağır Fətullayev və Seyran Qafarovun Silahlı Qüvvələrdə tutduqları vəzifələrdən növbəti dəfə azad edilmələri ilə bağlı məlumatlar yayılıb. Xatırladaq ki, adları çəkilən şəxslər barədə Müdafiə Nazirliyinin Mətbuat Xidməti cari ilin may ayının 3-də və 26-da rəsmi məlumat verib. Bir daha bildiririk ki, Bağır Fətullayev adlı şəxs nə Azərbaycan vətəndaşı, nə də Azərbaycan generalıdır və o, Azərbaycan Respublikası Silahlı Qüvvələrində hərbi xidmətdə olmayıb. Ehtiyatda olan polkovnik Seyran Qafarov isə hələ 9 yanvar 2009-cu il tarixdə "Hərbi xidmətkeçmə haqqında" Əsasnamənin 156-cı maddəsinin "b" bəndinə uyğun olaraq “yaşa görə” Silahlı Qüvvələr sıralarından ehtiyata buraxılıb, Müdafiə naziri general-polkovnik Zakir Həsənovun göstərişinə əsasən isə o, mülki işçi vəzifəsindən də azad edilib və Silahlı Qüvvələrin heç bir qurumunda nə hərbçi, nə də mülki işçi kimi qulluq edir”.
Qeyd edək ki, hərbi ekspert Üzeyir Cəfərov öz Feysbuk səhifəsində general Bağır Fətullayevin vəzifəsindən azad edildiyi, bundan dərhal sonra isə Sankt-Peterburqa getdiyi haqqında məlumat bölüşmüşdü. O, Bağır Fətullayevlə bərabər polkovnik Seyran Qafarovun da vəzifəsindən azad edildiyini bildirmişdi.
