Nigeriyanın şimalındakı Jiqava əyalətində yanacaq daşıyan tankerin partlaması nəticəsində həyatını itirənlərin sayı 181-ə yüksəlib.
AZXEBER.COM xarici mətbuata istinadən xəbər verir ki, Jiqava əyalətinin qubernatoru Umar Namadi oktyabrın 16-da ştatın Majiya bölgəsində yanacaq tankerinin partlaması ilə bağlı prezident Bola Əhməd Tinubu ilə görüşüb.
Namadi görüşdən sonra jurnalistlərə verdiyi açıqlamada oktyabrın 16-da baş verən partlayışda həyatını itirənlərin sayının 181-ə yüksəldiyini qeyd edib.
Partlayışda yaralanan 80 nəfərin müalicəsinin davam etdiyini bildirən Namadi partlayışdan 210 ailənin zərər çəkdiyini bildirib.
Qeyd edək ki, oktyabrın 16-da Jiqava əyalətinin Majiya rayonunda Kano-Hadeja magistral yolunda yanacaq daşıyan tanker sürətlə hərəkət edərkən idarəetmədən çıxaraq aşıb. Yerli əhali aşmış tankerdən yanacağı boşaltmağa çalışarkən tanker partlayıb və çoxlu insan yanaraq ölüb.
