"Stiver" ləqəbi ilə tanınan məşhur "Flibusta" onlayn "pirat" kitabxanasının yaradıcısı Almaniyada dünyasını dəyişib.
AZXEBER.COM xarici mətbuata istinadən bildirir ki, bununla bağlı xəbər layihənin rəsmi saytında yer alıb.
Onun evtanaziya (sağalmaz xəstəlikdən əziyyət çəkən insanı və ya heyvanı həyatdan öz istəyi ilə məhrum etmə) yolu ilə həyatına son qoyduğu bildirilib.
Uzun müddətdir beyin xərçəngi ilə mübarizə aparan Stiver, ölümündən əvvəl yayımladığı yazıda bir sıra ölkələrdə icazə verilən həkimin iştirakı ilə intihar yolu ilə ölməyi planlaşdırdığını bildirmişdi.
"Əgər hər şey plana uyğun gedərsə, mən sabah ölümcül doza alacağam. Ölüm xəbərimi çərşənbə axşamı günü rəsmi saytda dərc edin" deyə o, intihar mesajında qeyd edib.
Qeyd edək ki, Almaniya, Avstriya, Belçika, Kanada, İspaniya, İsveçrə və bir sıra digər ölkələrdə evtanaziya (həkim yardımı ilə intihar) qanunidir.
Xatırladaq ki, Rus və digər dillərdəki kitabların elektron versiyalarını pulsuz yükləyə biləcəyiniz "pirat" onlayn kitabxana "Flibusta" 2009-cu ildə yaranıb. 2015-ci ildə layihənin veb-saytı Rey Bredberinin kitablarını Rusiyada nəşr etmək hüququna sahib olan "Eksmo" nəşriyyatının iddiasından sonra Roskomnadzor tərəfindən bloklanıb. 2016-cı ildə Rusiyada müəllif hüquqlarının pozulması səbəbindən "Flibusta"ya giriş tamamilə qadağan edilib.
Aysel
