Son günlər ölkədə havaların dəyişməsi ilə birlikdə insanlar təbii vasitələrə üz tutmağa başlayıb. Bu sırada ən çox diqqət çəkən bitkilərdən biri isə itburnu olub. Həm bazarlarda, həm də apteklərdə itburnu meyvəsi və ondan hazırlanan çaylara tələbat xeyli artıb.
AZXEBER.COM xəbər verir ki, itburnu C vitamini ilə zəngin olması ilə yanaşı, immun sistemini gücləndirməkdə də əvəzolunmaz rol oynayır. Mütəxəssislər deyir ki, xüsusilə payız-qış mövsümündə itburnu çayı içmək qrip və soyuqdəyməyə qarşı təbii qoruyucu rolunu oynayır.
İtburnu meyvəsi eyni zamanda güclü antioksidant təsirə malikdir. Gündə bir fincan düzgün dəmlənmiş itburnu çayı orqanizmi viruslara qarşı daha dözümlü edir. Həmçinin qan təzyiqini tənzimləyir və damar sağlamlığını dəstəkləyir.
Bəzi araşdırmalar isə göstərir ki, itburnu çayının tərkibində olan maddələr revmatoid artrit zamanı yaranan oynaq ağrılarını azaltmağa da kömək edir.
Hazırda bir çox yerli brendlər itburnu meyvəsini müxtəlif formada satışa çıxarıb. Market və apteklərdə qurudulmuş itburnu, itburnu yağı və hətta kapsul formasında əlavələri tapmaq mümkündür. Qiymətlər isə məhsulun formasından və keyfiyyətindən asılı olaraq dəyişir.
Mütəxəssislər isə xəbərdarlıq edirlər: itburnunu faydalı etmək üçün onu doğru şəkildə dəmləmək lazımdır. İtburnunu qaynar suda deyil, ilıq suda, 10-15 dəqiqə ərzində dəmləmək tövsiyə olunur. Əks halda faydalı maddələrin bir hissəsi məhv ola bilər.
Aysel
