Polisə 'Ya' deyən jurnalist barəsində həbs qərarı

Türkiyədə jurnalist məruz qaldığı həbs qərarı səbəbindən şoka düşüb. Hadisə İzmir vilayətinin Dikili rayonunda meydana gəlib. Məlumata görə, yerli səhiyyə jurnalının rəhbəri olan Cəmil Dirim 2 il əvvəl getdiyi polis bölməsində növbətçi polisə “mövzu nədir ya?” (konu nedir ya?) deyə soruşub. Cəmil Dirim jurnalist olduğunu desə də bu hərəkətin təzyiq olduğunu deyən polis məmuru Ü.Y. “sən mənimlə necə “ya” ilə danışırsan” deyərək hiddətini bildirib.Daha sonra Ü.Y.-nin şikayəti əsasında Dirim barəsində “inzibati işçinin vəzifəsini icra etməsinə mane olmaq və buna qarşı müqavimət göstərmək” ithamı ilə məhkəmə iddiası qaldırılıb. Dirim barəsində 1 il həbs qərarı verən məhkəmə onun daha əvvəl məhkum olunmadığını və məhkəmə zalında özünü yaxşı apardığını nəzərə alaraq həbs müddətini 10 aya endirib.Cəmil Dirimin vəkili isə verilən cəzaya etiraz edərək “ya” dediyi üçün bir jurnalistin həbs olunmasının doğru olmadığını bildirib. Vəkil həmçinin verilən qərara yenidən baxılması üçün Berqama rayonu Ağır cinayətlərə dair məhkəməsinə 3 səhifəlik ərizə ilə şikayət edib.