Haqqında 4 aylıq ev dustaqlığı qəti imkan tədbiri seçilən Prezident Administrasiyasının sabiq rəhbəri, AMEA-nın keçmiş prezidenti Ramiz Mehdiyev hazırda Azərbaycan Təhlükəsizlik Şurasının üzvü olaraq qalır.
Ramiz Mehdiyevin Təhlükəsizlik Şurasının üzvlüyündən çıxarılması mövzusu hazırda gündəmdədir. Bəs belə olan halda Ramiz Mehdiyev Azərbaycan Təhlükəsizlik Şurasının üzvlüyündən necə çıxarıla bilər?
Hüquq müdafiəçisi Əliməmməd Nuriyev AZXEBER.COM-a açıqlamasında Təhlükəsizlik Şurasına üzvlüyün Prezidentin etimadına əsaslanan vəzifə olduğunu bildirib:
"Hazırda gündəlikdə müzakirə olunan məsələ olduqca əhəmiyyətli xarakter daşıyır və ona üç müstəvidə – hüquqi, institusional və etik-siyasi baxımdan yanaşmaq tələb olunur.
Hüquqi baxımdan qeyd edilir ki, Azərbaycan Respublikası Təhlükəsizlik Şurası Prezident yanında məşvərətçi orqandır və onun tərkibi Prezidentin sərəncamı ilə müəyyən edilir. Bu o deməkdir ki, şuraya üzvlük seçki və ya qanunla təsbit olunmuş status deyil, Prezidentin etimadına əsaslanan vəzifədir. Buna görə Prezident istənilən vaxt sərəncam verərək yeni üzv təyin edə və mövcud üzvü vəzifəsindən azad edə bilər.
Əlimməd Nuriyev ağır cinayətlərdə ittiham olunan Ramiz Mehdiyevin dövlət sirrlərinə çıxış hüququnu itirdiyini bildirib:
"Bunları nəzərə alaraq deyə bilərəm ki, prosesə hüquqi müstəvidə baxsaq bu zaman bir sıra məsələlər diqqətə alınmalıdır. Cinayət Məcəlləsinin 274, 278 və 193-1-ci maddələri – dövlətə xəyanət, hakimiyyəti zorla ələ keçirmə və çirkli pulların yuyulması – dövlət təhlükəsizliyinə qarşı ən ağır cinayətlər sırasında yer alır. Bu maddələr üzrə istintaq başladıqda və şəxsə rəsmi ittiham irəli sürüldükdə, həmin şəxs xüsusi rejimli dövlət sirlərinə çıxış hüququnu itirir.
Dövlət sirri haqqında qanunun 18-1.4 və 18-1.6-cı maddələrinə əsasən, şəxs barəsində cinayət təqibi varsa, onun dövlət sirrinə çıxış icazəsi dayandırılır. Bu halda belə şəxsin müvəqqəti olaraq vəzifədən uzaqlaşdırılması da hüquqi əsaslar çərçivəsində mümkündür. Beləliklə, hüquqi baxımdan bu kateqoriyaya aid edilən şəxsin Təhlükəsizlik Şurasında qalması qanunla yolverilməzdir, çünki bu strukturlarda çalışmaq üçün etibarlılıq və məhkəmə qərarı olmaması əsas şərtlərdəndir".
Əliməmməd Nuriyev qeyd edib ki, Təhlükəsizlik Şurası dövlətin təhlükəsizliyi ilə bağlı mühüm məsələlərin müzakirə olunduğu platformadır:
"Prezident yanında strateji təhlükəsizlik məsələlərinin koordinasiyası məqsədi ilə fəaliyyət göstərir. Şuranın tərkibində adətən baş nazir, müdafiə, daxili işlər, xarici işlər nazirləri, Dövlət Təhlükəsizliyi Xidmətinin rəhbərliyi və digər yüksək vəzifəli şəxslər yer alır. Bu qurumda dövlətin təhlükəsizlik maraqları, gizli və strateji qərarlar, milli müdafiə planları müzakirə olunur. Bu səbəbdən, belə ağır cinayətlərdə ittiham olunan şəxsin Şurada qalması həm praktiki təhlükə, həm də milli təhlükəsizlik üçün risk hesab edilir. Bu, dövlətin məxfi məlumatlarının sızması və ictimai etimadın zədələnməsi ilə nəticələnə bilər.
Məsələnin üçüncü tərəfi etik və siyasi müstəvidir. Bu səviyyədə vəzifə daşıyan şəxs barəsində belə iddiaların mövcudluğu dövlətin imicinə, Prezidentin Təhlükəsizlik Şurasının legitimliyinə və ictimai ədalət hissinə mənfi təsir göstərir. Hüquqi-mənəvi baxımdan təkcə şübhənin mövcudluğu belə, həmin vəzifənin daşınması üçün kifayət qədər əsas sayılmasa da, rəsmi ittihamın irəli sürülməsi artıq ictimai etimadın itirilməsi deməkdir. Bu kimi hallarda belə şəxslər bütün vəzifələrindən uzaqlaşdırılır.
Bütün bunlar nəzərə alınaraq demək olar ki, həmin şəxsin Təhlükəsizlik Şurasında qalması hüquqi baxımdan düzgün deyil. Şəxsə qarşı dövlət çevrilişi və digər ağır cinayətlər üzrə iddialar mövcuddursa, bu şəxs dövlət sirlərinə çıxış hüququ və təhlükəsizlik orqanında təmsilçilik imkanını itirir. Etik-siyasi baxımdan isə belə vəziyyət dövlətin etibarına və təhlükəsizliyinə zərbə vurur. Buna görə də belə şəxsin Təhlükəsizlik Şurasındakı üzvlüyü ən azı dayandırılmalı və yekunda ləğv edilməlidir".
Günel Hüseynli
