“Mən cəmiyyətimizdə, ölkəmizdə hər şeyin yaxşılaşmasını istəyən bir insanam”.
Bu sözləri AZXEBER.COM-a özəl açıqlamasında YAP-çı deputatı Rizvan Cəbiyevin oğlu, tanınmış reper Anar Nağılbaz müxalifətə qoşulması ilə bağlı mətbuatda yenidən yayılan xəbərlərlə bağlı danışarkən belə deyib. O Yeni Azərbaycan Partiyası (YAP) icra katibinin müavini, deputat Siyavuş Novruzovun bu gün onun haqqında söylədiyi fikirlərdən təəssüfləndiyini də söyləyib:
“Mən ümumiyyətlə heç bir siyasi partiyanın üzvü deyiləm və belə bir niyyətim də yoxdur. Ümumiyyətlə, mənim YAP-da da çoxlu sayda dostlarım var. Mən heç kəsin siyasi fikirlərinə görə, iki yerə bölmürəm. Çünki demokratik, sivil bir ölkədə yaşayırıq və hər kəsin sərbəst düşüncəsi ola bilər. Mən cəmiyyətimizdə, ölkəmizdə hər şeyin yaxşılaşmasını istəyən bir insanam. Hamı çıxıb “Bağda gül” oxumalı deyil ki? Mən də daha çox sosial mövzularda mahnılar ifa edirəm. Amma bunu siyasiləşdirmək lazım deyil”.
A.Nağılbaz söz-söhbətlərin ortaya çıxmasına səbəb olan şəkilin REAL hərəkatının ofisində çəkilməsinə də aydınlıq gətirib. Reper, hərəkatın ofisinə klip təqdimatı üçün getdiyini söyləyib:
“REAL-da mənim görüntülərimin yayımlanmasından sonra, mənim müxalifətə keçməyimlə bağlı xəbərlər yayıldı. Bir daha deyirəm ki, mənim nə REAL-la, nə də ki, digər siyasi partiyalarla heç bir əlaqəm yoxdur. Sadəcə olaraq mən ora, bir filmin təqdimatı ilə bağlı qonaq kimi çağrılmışdım. Orada xarici ölkə səfirləri də iştirak edirdi. Başa düşə bilmirəm ki, niyə məhz mənim oradakı şəklimi çəkib, adımı müxalifətçi kimi çıxardıblar. Amma mən özüm siyasət adamı deyiləm və ona görə də mətbuatda mənim adımdan bu cür yazmaq doğru deyil”.
Xatırladaq ki, Yeni Azərbaycan Partiyası (YAP) icra katibinin müavini, deputat Siyavuş Novruzov sabiq deputat Rizvan Cəbiyevin oğlu Anar Nağılbazın müxalifətə keçməsinə münasibət bildirib:
“Yenə deyirəm, seçim insanın özünə məxsusdur. İnsan bu yolu seçibsə, özü bilər. İndi elə bir dövrdür ki, qardaş qardaşa, oğul ataya, ata oğula cavabdehlik daşımağa çətinlik çəkir. Ona görə də hərənin öz seçimi var. Adam tanıyıram, uşaqların hərəsini bir partiyaya göndərir ki, harada imkan düşsə... Belə hallar vaxtilə də olub. Bu adamın isə orda olması heç nəyi dəyişmir. Yəni ümumiyyətlə, Azərbaycan cəmiyyətində heç bir göstərici deyil”.
Əfsələddin Ağalarov
