Türkiyənin mədəniyyət və turizm naziri Ertuğrul Günay iştirak etdiyi tədbirdə tələbələrin yumurtalı hücumuna məruz qalıb.AZXEBER.COM-un “Doğan” agentliyinə (DHA) istinadən verdiyi xəbərə görə, hadisə Ankara şəhəri Hacettepe universitetində keçirilən konsertdə meydana gəlib. Məlumata görə, “Tələbə Kollektivləri” təşkilatının bir qrup üzvü tədbirdə nazir Günaya yumurta atıb. Nazirin cangüdənləri çətir açaraq Ertuğrul Günayı atılan yumurtalardan qorumağa çalışıb. Daha sonra etirazçı tələbələr cangüdənlər və polislər tərəfindən zaldan çıxarılıb. Bayırda da etirazlarına davam edən 12 tələbə polis tərəfindən saxlanılaraq bölməyə aparılıb.Meydana gələn hadisə nəticəsində nazirə yumurta dəyməsə də Günay etirazçı tələbələrdən şikayətçi olub.Xatırladaq ki, bu, Türkiyədə nazirlərə qarşı keçirilən ilk analoji etiraz aksiyası deyil və bundan əvvəl də hökumət rəsmiləri dəfələrlə tələbələrin yumurtalı hücumuna məruz qalmışdı.
