Azərbaycan Yazıçılar Birliyinin üzvü Eduard Bağırovun Moldovada həbsdən qaçırılmasını təşkil edən şəxs saxlanılıb.

APA-nın Moldovanın “İNFİOTAQ” agentliyinə istinadən verdiyi məlumata görə, bunu prezident səlahiyyətlərinin icraçısı Marian Lupu deyib. O bildirib ki, E. Bağırov bir neçə şəxs tərəfindən Tiraspol (Dnestryanı ərazi) və Odessadan keçməklə qaçırılıb və Moldovanın əlində bu şəxslərin telefon danışıqları var. M. Lupu saxlanılan şəxsin adını açıqlamayaraq onun tanınmış biri olmadığını söyləyib.

“Novosti-Moldova” agentliyi isə bu şəxsin 19785-ci il təvəllüdlü Moldova vətəndaşı olduğu və ötən həftə həbs edildiyi haqda xəbər yayıb.

Xatırladaq ki, E. Bağırov 2011-ci il iyunun 15-də Moldovada kütləvi qarışıqlığın təşkili ittihamı ilə həbs olunub. Rusiya XİN Moldova hökumətindən E. Bağırovun azadlığa buraxılmasını tələb edib. Yazıçı haqqında həbs-qətimkan tədbiri ev dustaqlığı ilə əvəzlənib. Oktyabrın 19-da məlum olub ki, E. Bağırov Moskvaya qaçıb.