Məhz həmin telekanaldakı izdivac verilişləri xüsusilə tənqid olunur, verilişin detalları müzakirəyə çıxarılır və N.Məhərrəmlinin bununla bağlı verdiyi rəylər mərkəzə gətirilir. Xatırladaq ki, N.Məhərrəmli məhz “Azərbaycan” qəzetinə müsahibəsində bu sayaq verilişlərlə bağlı aşağıdakı fikri bildirib: “Azərbaycan ailəsi kimi unikal və müqəddəs bir anlayış ölkənin efir məkanında aşağılanmamalıdır. Böyük ölkələrdə belə layihələr tamaşaçıya təklif olunan çoxsaylı mövzuların sırasında bir o qədər hiss olunmur. Amma Azərbaycan kimi kiçik bir ölkədə ailə ilə bağlı səviyyəsiz layihə açmaq qəbulolunmazdır. Təbii ki, belə layihələr ictimaiyyətin haqlı narazılığına səbəb olur”.
“Azərbaycan” qəzetinin statusunu və mövzunu dəfələrlə gündəmə çıxarmasını nəzərə aldıqda bu müzakirələrin sonucu da istər-istəməz maraq doğurur. Bu proses telekanallarda sözügedən layihələrin yığışdırılması ilə sonuclanacaq? Məqsəd ictimai rəyi buna hazırlamaqdırsa, bu, son nəticədə necə həll olunacaq? Və ANS-ə yüklənmə faktoru da diqqət çəkən məqamdır. Telekanalda son bir neçə ayda vergi yoxlamalarının da aparıldığını nəzərə alanda istər-istəməz belə sual yaranır ki, ANS-ə növbəti zərbə hazırlığı görülür?
ANS Şirkətlər Qrupunun ictimai məsələlər üzrə baş müşaviri Mais Məmmədov sualımızı eşidən kimi hazırda toplantıda olduğunu, 15 dəqiqə sonra zəng etməyimizi söylədi. Dediyi vaxtda və günün növbəti saatlarında isə M.Məmmədov telefonunu qapatdı.
//"Yeni Müsavat"
