Avropa İttifaqında (Aİ) iyulun 19-dan etibarən iri şirkətlərin satılmamış yeni geyim və ayaqqabıları utilizasiyaya göndərməsinə qadağa qüvvəyə minib.
Bu barədə SWR məlumat yayıb.
Məlumata görə, bu gündən etibarən böyük geyim satıcıları mövsüm sonunda satılmayan yeni malları məhv etmək üçün utilizasiyaya verə bilməzlər. Müvafiq qərar hələ 2026-cı ilin əvvəllərində qəbul edilib. Qadağa iri şirkətlər üçün 19 iyul 2026-cı ildən, orta ölçülü şirkətlər üçün isə 2030-cu ilin iyulundan etibarən tətbiq olunacaq.
Avropa Ətraf Mühit Agentliyinin qiymətləndirmələrinə görə, indiyədək Avropada bazara çıxarılan tamamilə yeni tekstil məhsullarının 4-9 faizi utilizasiyaya göndərilib. Bunlara, əsasən, alıcılar tərəfindən geri qaytarılan və ya satılmamış kolleksiya qalıqları daxildir. Hər il zibilxanalara 600 min tona qədər tekstil tullantısı atılır.
Yeni tələblərə əsasən, bu məhsullar üçün alternativ istifadə yolları tapılmalı, onlar xeyriyyə təşkilatlarına verilməli və ya təkrar emala yönləndirilməlidir. Qadağa tam xarakter daşımır: texniki və ya təhlükəsizlik səbəbindən təkrar istifadəsi mümkün olmayan məhsullar üçün istisnalar nəzərdə tutulur.
Qeyd edək ki, Avropa Parlamenti 2025-ci ilin noyabrında əsasən asiyamənşəli və çox aşağı qiymətlərlə məhsul təklif edən onlayn mağazalara nəzarəti gücləndirən qətnamə qəbul edib. Fransada isə "Shein" və "Temu" kimi platformaların fəaliyyətini məhdudlaşdıran yenilənmiş qanun layihəsi təsdiqlənib.
