“Azərbaycan müxalifətinin dindar kəsimlə işləmək qaydası da çox primitiv olub. Yəni narazıdırlarsa, gəlsinlər bizimlə bir yerdə olsunlar. Bunun dövrü artıq keçib. Bu nöqteyi-nəzərdə hökumət müxalifətdən bir addım qabaqdadır”. Bunu Publika.az-a müsahibəsində tarix elmləri namizədi, tanınmış ekspert, müxalifyönümlü REAL hərəkatının İdarə Heyətinin üzvü Altay Göyüşov deyib.

Onun sözlərinə görə, hakimiyyətin dindar təbəqə ilə işi daha professionaldır və nəticə də özünü göstərir: “Azərbaycan müxalifəti faktiki olaraq özünün professionallığını artırmalıdır. Özünü siyasi ideyalarını meydana qoymalıdır, yəni nə istəyir bu həyatdan?! Artıq demək olmaz ki, “mən həm sağla, həm solla, həm kommunistlə, həm millətçi ilə, həm liberalla, həm dindarla birləşirəm”. Bütün dünyada olduğu kimi siyasi ideologiyalar olmalıdır”.

Altay Göyüşov hesab edir ki, dindar təbəqə builki prezident seçkilərində daha çox hökumətin tərəfində olacaq.