Bütün dünyanın diqqət mərkəzində olan növbəti “El Klassiko” keçirilib. zəli rəqiblər olan “Real”la “Barselona” bu dəfə İspaniya kubokunun ¼ final mərhələsinin ilk oyununda üzləşib. Komandaların cari mövsümdə 2-ci görüşü də “Santyaqo Bernabeu”da olub və yenə qonaqlar qələbəni bayram edib. Halbuki oyunda hesabı 11-ci dəqiqədə madridlilər açıb. Dünyanın ən bahalı futbolçusu olan portuqaliyalı hücumçu Kriştianu Ronaldo matçda ilk qolun müəllifi olub. Ancaq “Barsa” fasilədən sonra nəinki hesabı bərabərləşdirib, qələbə topunu da vura bilib. Özü də maraqlıdır ki, “Real”ı rəqibin müdafiəçiləri cəzalandırıb. “Barsa”nın kapitanı Karles Puyol 49-cu dəqiqədə tarazlığı bərpa edib, Erik Abidal 87-ci dəqiqədə oyunda son nöqtəni qoyub – 2:1.Komandaların İspaniya çempionatının cari mövsümündə Madriddəki ilk oyununun da eyni ssenari ilə keçməyi diqqət çəkir. Onda da “Real” erkən qol vurmuş, artıq 1-ci dəqiqədə fərqlənmişdi. “Barsa” sonradan 3 qol vuraraq, qələbəni bayram etmişdi. Ancaq kubokda qalib 2 oyunun nəticəsi ilə müəyyənləşəcəyindən, yarımfinala çıxacaq komandanın adına yanvarın 25-də “Nou Kamp”dakı cavab matçında aydınlıq gələcək. İstənilən halda, “Barsa”nın meydan sahibi olacağı oyunda mərhələ adlamaq şansı daha çoxdur. Göründüyü kimi, “Real” çempionatda 5 xallıq fərqlə irəlidə olduğu liderliyi ən yaxın izləyicisi “Barsa”ya verməmək üçün kuboku qurban vermək fikrindədir.Qeyd edək ki, portuqaliyalı Joze Mourinyo “Real”ın baş məşqçisi olduğu 2-ci mövsümdə “Barsa”ya yalnız 1 dəfə - ötən mövsüm ölkə kubokunun finalında Ronaldonun vurduğu yeganə qolla qalib gəlib.
