Sürücünü öldürüb pulunu və maşını ələ keçirmək istəyənlərin özü ələ keçdi
Lerik rayonunda lənkəranlı sürücüyə qarşı dəhşətli quldurluq hadisəsi törədilib. Hadisə Lənkəran-Lerik yolunun 35-ci km-də, axşam saat 21 radələrində baş verib. İstiPress-in Cənub bürosunun məlumatına görə, taksi fəaliyyəti ilə məşğul olan Lənkəran şəhər sakini, 1969-cu il təvəllüdlü Əzimov Bahadır Cavad oğlu idarə etdiyi VAZ 21 723 markalı maşınla Lənkəran şəhərindəki Ləvəngi dayanacağında müştəri gözləyərkən tanımadığı 4 şəxs ona yaxınlaşıb. Sürücüdən onları Lerik rayonundakı Relaks istirahət mərkəzinə yaxın ərazidə yerləşən tanışlarının evinə aparmağı xahiş ediblər. Sürücü həmin şəxsləri də götürüb avtomobili deyilən əraziyə sürüb. Sərnişinlər sürücüdən 35-ci ikm-də maşını saxlamağı tələb edib və özünü də zorla maşından düşürüblər.S ürücüyə qarşı zorakılıq hərəkətləri edilib, bir nəfər isə əlindəki cib bıçağı ilə onun sol bazu nahiyəsinə xəsarət yetirərək yaralayıb. Özünü iyirməyən sürücü quldurların başının qarışmağından istifadə edərək onların əlindən qaçmağa nail olsa da, təqibə məruz qalıb, quldurlar onun dalınca qaçıblar. Bir nəfər isə sürücünü öz maşını ilə təqib edib. Ani sıçrayışla özünü maşınına atan sürücü qulduru itələyərək Lerik istiqamətində sürərək ölümdən qurtula bilib və dərhal Daxili İşlər Nazirliyinin (102) xidmətinə məlumat verib.
Lerik rayon polis şöbəsi əməkdaşlarının apardığı operativ əməliyyat nəticəsində hadisəni törətməkdə şübhəli bilinən şəxslərin hamısı saxlanılıb. Onlar 1995-ci il təvəllüdlü, sinif yoldaşları olan Astara rayonunun Siyakü kənd sakinləri Ramil Ramiz oğlu Şabanov, Elvin Şadoğlan oğlu Rzayev, Rəhim Məmməd oğlu Hacıyev və Rinə kənd sakini, 1996-cı il təvəllüdlü Əlizadə Şamo Şahbaz oğludur. Artıq rayon polis şöbəsində Azərbaycan Respublikası CM-nin 181.2.1 və 181.2.5 maddələri ilə cinayət işi başlanıb, istintaq gedir.
İlkin ifadələrində saxlanılan şəxslər törətdikləri əməli etiraf ediblər.
