Hər zaman deputatlar arasında müxtəlif peşə sahibləri olduğu kimi, bir çox sənət adamları, aktyorlar, şairlər, o cümlədən də müğənnilər yer alıb.
AZXEBER.COM bu günə qədər deputat kürsüsündə əyləşən məşhurları araşdırıb sizə təqdim edir.
Parlamentdə görməyə alışdığımız ən məşhur sima Xalq artisti Zeynəb Xanlarova olub. O, 1995, 2000, 2005, 2010 və 2015-ci il deputat seçkilərində iştirak edərək qalib olub.
Azərbaycanın mərhum xalq şairləri Zəlimxan Yaqub və Bəxtiyar Vahabzadə birinci və ikinci çağırış, Vaqif Səmədoğlu isə birinci, ikinci və üçüncü çağırış Milli Məclisin deputatları olub.
Hazırda 86 yaşı olan Xalq yazıçısı, ssenarist Anar da birinci və ikinci çağırış Milli Məclisin deputatı seçilib.
Deputat kimi fəaliyyət göstərən digər məşhur isə Xalq yazıçısı, kinodramaturq, rejissor Maqsud İbrahimbəyovdur. O, 1995, 2000 və 2005-ci illərdə millət vəkili seçilib.
2018-ci ildə dünyasını dəyişən Xalq artisti Amaliya Pənahova da 2000–2005-ci illərdə Azərbaycan Respublikası Milli Məclisinin millət vəkili seçilib.
Xalq artisti, Azərbaycanın Rusiyadakı fövqəladə və səlahiyyətli səfiri Polad Bülbüloğlu isə 1995-ci ildə təkrar səsvermə yolu ilə birinci çağırırş Milli Məclisə deputat olub.
Hazırda Milli Məclisdə yazıçı, jurnalist Aqil Abbas, xalq şairi Sabir Rüstəmxanlı, jurnalist, yazıçı Bəxtiyar Sadıqov təmsil olunur. Onların qarşıdan gələn seçkilərdə iştirak edib-etməyəcəyi bəlli deyil.
Aysel Hacızadə
