"44 günlük Vətən Müharibəsindən sonra təbii ki, bölgədə yeni yaranmış siyasi, hərbi, iqtisadi vəziyyət Azərbaycanın diqtəsi və nəzarəti altındadır. Son zamanlar Azərbaycanın təklif etdiyi 5 baza prinsipi, sülh gündəliyi, Ermənistanın ağaları tərəfindən, Azərbaycan və Ermənistan arasında daimi sülhün yaranmaması üçün çalışan qüvvələr tərəfindən pozulmaqdadır. Həmişə olduğu kimi, ağasının qulu olan, müstəqil siyasət yürüdə bilməyən Ermənistan toplumu yenidən eyforiyaya qapılaraq bu gün həmin sülh gündəliyinin gedişini pozmağa çalışır. Konkret olaraq son zamanlar müxtəlif təxribatlarla bu danışıqların baş tutmaması üçün bütün işləri görməklə məşğuldur”.
Bu sözləri AZXEBER.COM-a açıqlamasında Milli Məclisin deputatı Vüqar İskəndərov deyib.
Deputat qeyd edib ki, Azərbaycan tərəfi bu təxribatların hər birinin qarşısını qətiyyətlə alır: "Son zamanlar Laçın yolunun alternativi olan, dağların arası ilə keçən Xankəndi-Xəlfəli-Turşsu yolunda gecənin qaranlığında, dumanlı vaxtlarda oradan hərbi sursat, insanlar keçirilməsi, hətta müvəqqəti yerləşdirilmiş rus sülhməramlılarının da biz burada dəstəyini görürük. Bu, çox təəssüf doğurur. Çünki bu, onların missiyası deyil, əksinə qarşısını almalı olduqlarını, baş verməməsi üçün orada olduqlarını yəqin ki, unudublar. Onlar hazırda Azərbaycan xalqı tərəfindən özlərinə qarşı çox böyük etimatsızlıq qazanırlar. Bu da hər gün artmaqdadır. Bu gün həmin bölgələrdə baş verən bütün neqativ hadisələrə həm Ermənistan hərbi-siyasi rəhbərlərliyi, həm də Rusiya sülhməramlıları da məsuliyyət daşıyır. Çünki 10 Noyabr Bəyanatından irəli gələn məsələlərin həll olunması üçün sülhməramlılar məsuldurlar. Hazırda konkret iki bəndin icra olunmamasının məsuliyyətini Ermənistanla bərabər onlar da daşıyırlar”.
Deputat qeyd edib ki, Ermənistan növbəti dəfə mat vəziyyətinə düşdü:
"Azərbaycan bir neçə dəfə onları təxribatlardan çəkinməyə çağırdı. Artıq konkret olaraq Azərbaycan yenidən Ali Baş Komandanın tapşırığı ilə qətiyyətli addım ataraq həmin bölgədə möhkəmləndi və dediyimiz həmin alternativ yollardan da qanunsuz keçidin qarşısı alındı və Ermənistan növbəti dəfə mat vəziyyətinə düşdü. Amma buna qədər Rəsmi Bakı dəfələrlə Ermənistanı və Qarabağda olan cinayətkar tör-töküntüləri və yaraqlılarına oradan çıxıb getməli olduqlarını bildirmişdi”.
Vüqar İskəndərov bildirib ki, son zamanlar erməni təxribatlarının qarşısının alınması və son əməliyyat bir daha Ermənistanı yaxşı düşündürməlidir: "Ermənistanın siyasi-hərbi rəhbərliyi anlamalıdır ki, onların bu gün törətdiyi təxribatların hər birinin kəskin cavabı veriləcək. Çünki Azərbaycan beynəlxalq hüquqla hərəkət edir. Azərbaycan öz suveren ərazisində nəyin necə olmasını özü müəyyənləşdirir. Hər hansısa hadisəyə görə məsuliyyəti Ermənistan hərbi-siyasi rəhbərliyi, Qarabağda hələ də mövcud olan daşnaqlar, cinayəkarlar daşıyır. İndiki halda onlara göz yuman Rusiya sülhməramlıları da eyni məsuliyyəti daşıyır”.
Aydın Nuri
