Gürcüstan Bakı-Tiflis-Axalkalakı-Qars dəmiryolunun tikintisini sürətləndirdi - VİDEO
SİYASƏT
00:42 23.08.2013
1344
Bakı-Tiflis-Axalkalakı-Qars dəmir yolu layihəsinin Gürcüstan hissəsində tikinti işlərinin gecikməsi Gürcüstan hökümətini ciddi addımlar atmağa vadar edib. Problemləri aradan qaldırmaq və işləri sürətləndirmək istəyən rəsmi Tiflis podratçı şirkətdə ciddi dəyişikliklər edib. Bakı-Tbilisi-Qars dəmir yolunun Gürcüstan hissəsinin operator-şirkəti, “Marabda-Karçaxi dəmir yolu” Məhdud Məsuliyyətli Cəmiyyətinin baş direktoru vəzifəsinə Oleq Biçiaşvili təyin edilib. O, əvvəllər “Gürcüstan dəmir yolları” Səhmdar Cəmiyyətinin rəhbəri vəzifəsində çalışıb.“Marabda-Karçaxi dəmir yolu” Məhdud MC-nin layihə kuratoru Rati Divali ANS-ə açıqlamasında bildirdi ki, Oleq Biçiaşvilinin təyinatı ilə işlər daha da intensivləşib. O, son günlər mediada Bakı-Tiflis-Axalkalakı-Qars dəmir yolu layihəsinin Gürcüstan hissəsində tətillərin olması və işlərin təmamilə dayandırılması barədə xəbərlərə də aydınlıq gətidi.“Marabda-Karçaxi dəmir yolu” MMC-nin layihə kuratoru, Rati Divali: “Bəli artıq bizim şirkətə rəsmi qaydada Oleq Biçiaşvili rəhbərlik edir. Mediada tətillərin keçirilməsi ilə bağlı xəbərlərin heç bir əsası yoxdur. Yeni təyinat isə işlərin daha da sürətləndirilməsi məqsədi ilə edilib. Bu layihə bizim ən böyük və ən çox ümid bəslədiyimiz layihədir. Və biz çalışacağıq ki, tikinti işləri 2014-cü ilin sonuna kimi tamamlansın”.Son vaxtlar Gürcüstan prezidenti Mixail Saakaşvili tez-tez dəmir yolunun Gürcüstan hissəsinin tikinti işlərinin ləngiməsindən şikayətlənirdi. Məsələnin Azərbaycan tərəfdən daim diqqətdə saxlandığını bildirən Azərbaycan Nəqliyyat Nazirinin Birinci Müavini Musa Pənahov isə bildirdi ki, layihədəki gecikmələrin tez bir zamanda aradan götürülməsi üçün Gürcüstan tərəfi ilə danşıqlar aparılır. Həmçinin onlara lazımı qədər maliyyə yardımı da göstərilib. Layihənin tam vaxtında başa çatdırılması Gürcüstan tərəfin öhdəliyidir.Xatırladaq ki, “Bakı-Tbilisi-Qars” dəmir yolu layihəsi çərçivəsində dəmir yolu magistralının 105 km-lik qolunun tikilməsi planlaşdırılır. Bundan başqa, Gürcüstanda Ahalkalaki-Marabda-Tbilisi dəmir yolu məntəqəsi yenidən bərpa olunacaq ki, bu da onun buraxılış qabiliyyətini ildə 15 milyon ton yükə çatdıracaq. Ahalkalakidə Gürcüstanda mövcud olan dəmir yolundan Avropaya qatarların ötürülməsi üzrə məntəqə də tikiləcək, Avropa dəmir yolu şəbəkəsinə birbaşa girişi olacaq Bakı-Tbilisi-Qars dəmir yolu magistralı üzrə hər il 30 milyon ton yükün daşınması gözlənilir.
