Bu il yaradıcılıq yubileyinə hazırlaşan Azərbaycanın və Dağıstanın xalq artisti, türk dünyasının sənət kraliçası İlhamə Quliyeva yeni layihələrinin həyata keçirilməsinə başlayıb. Bu barədə ANS PRESS-ə İlhamə xanımın mətbuat katibi Faiq Ələkbərov məlumat verib. Həmin layihələrdən biri görkəmli sənətkarımızın xanım həmkarlarından biri ilə duet ifa etməsi olacaq. Dünya şöhrətli bəstəkarımız Fikrət Əmirovun məhz İlhamə xanım üçün bəstələdiyi “Mən səni araram” mahnısını respublikanın əməkdar artisti Sevda Ələkbərzadə ilə birlikdə ifa edəcək.Yeni üslubda aranjeman olunacaq duet tamaşaçılara bu dəfə tam fərqli şəkildə təqdim olunacaq. Qeyd edək ki, bu məşhur mahnının sözləri Tələt Əyyubova məxsusdur. Hər iki ifaçı duet oxuduqdan sonra mahnının klip çəkilişlərinə start veriləcək.
