Musavat prezidentliyə öz namizədini irəli sürüb.

Bir qrup müxalifətin yaratdığı Milli Şura vahid namizəd kimi kinodramaturq Rüstəm İbrahimbəyovun namizədliyini irəli sürsə də, hadisələrin sonrakı inkişafı göstərir ki, başqa namizədlər də olacaq. Artıq Musavat Partiyası İsa Qəmbərin seçkilərdə namizədliyini dəstəklədiyini bəyan edib.Milli Şuranın keçirdiyi növbəti sessiyanın ilk 5 dəqiqəsi mətbuata açıq oldu. Sessiyada Şura özlərinə yeni seçki qərargahının yaradılması haqda qərar qəbul etdi. Qərargahın rəhbəri postuna isə Milli Şuranın icra aparatının rəhbəri Eldar Namazov təyin olundu. Sessiyada həm də Şura sədri Rüstəm İbrahimbəyovun Şura üzvlərinə ünvanladığı müraciət müzakirə olundu. Müraciətdə sədr onun namizədliyi qeydə alınmadığı halda belə demokratik düşərgəyə seçkidə ikinci namizədlə iştirak etməməyi təklif edib.Bu müraciətə baxmayaraq Musavat Partiyası prezident seçkisinə irəli sürdyü İsa Qəmbərin namizədliyini geri götürmək niyyətində olmadığını açıqlayıb.Musavat Partiyasının sədr müavini Arif Hacılı: “Musavat Partiyası yanvar ayının 4-də İsa Qəmbərin namizədliyinin irəli sürülməsi haqda qərar qəbul edib və bu qərar bu günə qədər qüvvədədir. Bu qərarı yalnız Musavat Partiyasının muvafiq strukturları dəyişə bilər. Bu bir seçki taktikasıdır. Biz fikirləşirik ki, bu cür seçki taktikası prezidentliyə vahid namizəd Rustəm İbrahimbəyovun namizədliyini qeydə alınmasına yardımçı bir taktikadır”.Öz namizədini irəli sürməklə yanaşı, partiya həm də daxil olduğu Milli Şuranın Rüstəm İbrahimbəyovun prezident seçkisinə yeganə namizədliyini də dəstəklədiyini deyir. Şura tərkibində fikir ayrılığına gətirib çıxaracaq bu məsələni isə Musavat Partiyasının başqanı İsa Qəmbər şəhr etməkdən yayındı.Eldar Namazov digər müxalif partiyaların öz namizədini irəli sürməsinin hakimiyyətin Milli Şuranın vahid namizədini qeydə alınmasında daha sərt mövqe nümayiş etdirməsinə səbəb olacağını deyir. Belə ki, Şuranın məhz partiyalar arasında namizədlərlə bağlı ortaq məxrəcə gəlinməməsi, onların ətrafında demokratik düşərgənin birləşməyin mümkün olmaması səbəbindən yarandığını deyir. Hansı ki, bu birliyi məhz Milli Şura təmin edib: “Əgər biz Milli Şurada birləşib onlarla bir şey edə bilmiriksə, ayrı-ayrı partiyalar bir yerdə nə qazanacaqlar? Ona görə də mən bu fəlsəfəni əvvəldən hər şeyi hakimiyyət vermək kimi qəbul edirəm. Bizim vahid namizədimiz də, alternativ namizədimiz də Rüstəm ibrahimbəyovdur”.Xatırladaq ki, bir müddət əvvəl Milli Şura prezidentliyə vahid namizədini irəli sürəndə də bu ciddi müzakirə mövzusu olmuşdur.