"Çempionlar Liqasının play-off mərhələsində "Qarabağ"ın rəqibi Macarıstanın "Ferenstvaroş" klubudur. Yetərincə güclü rəqibdir. "Qarabağ"ın əvvəlki rəqibləri olan "Şkendiya" ve "Şelborn"dan fərqli olaraq, daha güclü futbolçulardan qurulmuş kollektivə malikdirlər".
Bu sözləri AZXEBER.COM-a açıqlamasında tanınmış idman şərhçisi Kənan Məstəliyev deyib.
O qeyd edib ki, rəqib klub futbolçuları ilə yanaşı uğurlu məşqçi tarixçəsi olan məşhur bir klubdur:
""Ferenstvaroş" bu yay qarşılaşdığımız rəqiblərdən ən güclüsüdür. Ancaq nəzərə almaq lazımdır ki, "Qarabağ" da zəif komanda deyil. "Qarabağ" 3 il əvvəl "Ferenstvaroş"u Çempionlar Liqasının təsnifat mərhələsində keçmiş komandadır. "Qarabağ"ın üstünlüyü ondan ibarətdir ki, burada vahid bir sistem var, Qurban Qurbanovun rəhbərliyi altında komanda uğurlu qrafik cızır və sabit nəticələrə malikdir".
Şərhçi bildirib ki, ilk oyunun səfərdə olması klubumuz üçün üstünlükdür:
"Necə ki "Ferenstvaroş" "Qarabağ" üçün çətin rəqibdir, "Qarabağ" da "Ferenstvaroş" üçün çətin rəqibdir. Oyun maraqlı, qarşılıqlı hücumlarla zəngin, mübarizəli keçəcək. Birinci oyunun səfərdə olması üstünlüyümüzdür. Oradan yaxşı nəticə ilə geri dönsək doğma meydanda, divarlar arasında azarkeşlərimiz qarşısında təzyiq yaradaraq, basqı quraraq böyük bir futbol bayramı edə bilərik. Düşünürəm ki, "Qarabağ" bu işin öhdəsindən gəlməyə qadir komandadır və gələcək də".
Günel Hüseynli
