40 turluq marafonun sonunda qızıl medalların sahibini “Şükrü Saracoğlu” stadionunda keçiriləcək möhtəşəm oyun müəyyənləşdirəcək. “Qalatasaray” qalib gəlsə və ya heç-heçə etsə, “Fənərbağça” isə yalnız qələbə qazansa çempion olacaq. “Qalatasaray” “Şükrü Saracoğlu”da uduzurKritik derbi öncəsi statistika heç də “sarı-qırmızılar”ın xeyrinə deyil. “Cim-Bom” “Şükrü Saracoğlu” stadionunda son 13 il ərzində keçirdiyi oyunların heç birindən qalib ayrıla bilməyib. “Qalatasaray” bu arenada son qələbəsini 1999-cu ildə qazanıb. Əzəli rəqiblər arasında “Şükrü Saracoğlu”dakı son 15 matçdan 11-də “Fənərbağça” gülən tərəf olub, 4 oyun isə heç-heçə nəticələnib. “Fənər”in bu oyunlarda vurduğu 35 topa “Cim-Bom” cəmi 12 qolla cavab verə bilib. “Fənərbağça”nın üstünlüyü ev amili... Son illərdə “Fənər” əzəli rəqiblərinə qarşı ev oyunlarında böyük üstünlük əldə edib və məğlubiyyət üzü görməyib. “Sarı-lacivərdlilər” “Şükrü Saracoğlu”da “Qalatasaray”a 12, “Beşiktaş”a 8 matçda uduzmayıb. “Qalatasaray”la oyunlarda 10 qələbə, 2 heç-heçə, “Beşiktaş”la matçlarda isə 5 qələbə, 3 heç-heçə qeydə alınıb. ... Zəif tərəfi final həyəcanıdır“Fənərbağça” son 11 ildə çempionat və kubok matçlarında 7 dəfə qələbəni axırıncı turlarda əldən verib. Ötən mövsüm çempionluq şansını son turda əldən verməsə də, “Fənər” ondan əvvəlki mövsümlərdə çoxsaylı üzüntülər yaşayıb. “Sarı-lacivərdlilər” 2000-2011-ci il mövsümündən sonra çempionatda 2, kubokda 5 dəfə həlledici matçların stressini üzərindən götürə bilməyib. Bu komanda 2005-2006 və 2009-2010-cu il mövsümlərində çempionluqları son matçlarda etdiyi heç-heçələrlə, 2000-2001, 2004-2005, 2005-2006, 2008-2009 və 2009-2010-cu il mövsümlərində isə kuboku finalda uduzmaqla qaçırıb.
