Yay aylarında sevilərək istehlak edilən dönər bəzi hallarda sağlamlıq üçün ciddi təhlükəyə çevrilə bilər. Xüsusilə mayonez, ketçup və digər sousların isti havada düzgün saxlanılmaması, həmçinin toyuq ətinin lazımi temperaturda bişirilməməsi və ya uzun müddət açıq şəraitdə qalması qida zəhərlənməsi riskini artırır.
Bəs yayda dönər alarkən nələrə diqqət etmək lazımdır və hansı hallarda onu yemək təhlükəli hesab olunur?
Azərbaycan Qida Təhlükəsizliyi Agentliyindən (AQTA) AZXEBER.COM-a bildirilib ki, dönər hazırlanmasında istifadə edilən ət mütləq baytarlıq-sanitariya ekspertizasından keçirilməlidir:
"Dönər istehsalı və satışı ilə məşğul olan ictimai iaşə obyektlərində qida təhlükəsizliyi tələblərinə ciddi əməl olunmalıdır. Dönər hazırlanmasında istifadə edilən ət mütləq baytarlıq-sanitariya ekspertizasından keçirilməlidir. Dondurulmuş çiy dönər donu açıldıqdan sonra bişirilənə qədər +1°C ilə +4°C temperatur intervalında saxlanmalı və daşınmalı, bu müddət ümumilikdə 8 saatı keçməməlidir”.
Qurumdan bildirilib ki, qida məhsullarının hazırlanması, saxlanması zamanı sanitar-gigiyenik normalara əməl olunmalıdır:
"Qida məhsullarının hazırlanması, saxlanması və təqdim edilməsi zamanı sanitar-gigiyenik normalara, xüsusilə temperatur rejiminə ciddi riayət edilməlidir. Qida blokunun təmiz saxlanılması, avadanlıqların mütəmadi yuyulması və dezinfeksiyası təmin edilməlidir.
Çarpaz çirklənmənin qarşısının alınması məqsədilə çiy və bişmiş məhsullar üçün hazırlıq sahələri ayrılmalı, istifadə olunan alətlər və iş səthləri fərqləndirilməlidir. İşçi heyət mütəmadi tibbi müayinələrdən keçməli, şəxsi gigiyena qaydalarına əməl etməlidir. Dönər hazırlayan şəxslər birdəfəlik əlcək, qoruyucu geyim və baş örtüyündən istifadə etməli, istifadə etdikləri əlcəklə pul, ödəniş kartı, kassa aparatı, POS-terminal və digər əşyalara toxunmamalıdırlar”.
Eyni zamanda agentlik vurğulayıb ki, satış zamanı bişmiş dönərin temperaturu 65°C-dən aşağı olmamalıdır:
"Satış zamanı bişmiş dönərin temperaturu 65°C-dən aşağı olmamalıdır. Dönərlə birlikdə təqdim edilən souslar, mayonez və tərəvəzlərin saxlanma rejiminə də ciddi nəzarət edilməlidir. Çiy dönər bişirilməyə başlandığı andan etibarən 12 saat ərzində istifadə olunmalı, hazırlanmış dönər isə 1 saat ərzində istehlak edilməlidir”.
Şahanə Ziyad
