Azərbaycanda beynəlxalq axtarışda olan Tacikistan vətəndaşı, iri narkotik alverçisi Emomov Taqaymurod saxlanılıb.
O, Rusiya ərazisinə yüzlərlə kiloqram heroinin qanunsuz daşınmasında ittiham olunur.
Rusiya hüquq-mühafizə orqanlarının TASS-a verdiyi məlumata görə, Taqaymurod artıq 11 ildən çoxdur ki, xüsusilə külli miqdarda narkotik vasitələrin qanunsuz dövriyyəsinə görə axtarışda idi. Hazırda onun Rusiya Federasiyasına ekstradisiyası gözlənilir.
İstintaq materiallarına əsasən, T.Emomov narkotik vasitələrin yayılması ilə məşğul olan geniş şəbəkənin təşkilatçısı olub. O, kuryerlər vasitəsilə Rusiyaya yüzlərlə kiloqram heroinin daşınmasını təşkil edib. Onun rəhbərlik etdiyi qrupun bir çox üzvü artıq məsuliyyətə cəlb edilib, ifadələrində Emomovun adını çəkiblər. Həmin şəxslərdən bəziləri artıq cəza müddətini başa vuraraq azadlığa buraxılıb.
Hazırda hüquq-mühafizə orqanları bu genişmiqyaslı narkotik şəbəkənin digər əlaqələrini də araşdırır.
///musavat
