Azərbaycan xalqının tarixində elə günlər var ki, onlar təkcə təqvimdə bir tarix deyil, həm də milli qürurun, birliyin və qəhrəmanlığın rəmzi kimi yadda qalır. 20 oktyabr – Zəngilan şəhəri günü də bu əlamətdar günlərdəndir.
2020-ci il sentyabrın 27-də başlayan Vətən müharibəsi Azərbaycanın ərazi bütövlüyünün bərpası istiqamətində tarixi mərhələ oldu. Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun apardığı uğurlu hərbi əməliyyatlar nəticəsində işğal altında olan torpaqlarımızın böyük bir hissəsi azad edildi. Bu Zəfərin mühüm mərhələlərindən biri də 2020-ci il oktyabrın 20-də Zəngilan şəhərinin və rayonun bir sıra kəndlərinin işğaldan azad olunması idi.
Zəngilanın azad edilməsi yalnız hərbi uğur deyil, həm də Azərbaycanın suverenliyinin və ərazi bütövlüyünün bərpası yolunda mühüm strateji əhəmiyyət daşıyan hadisə idi. Bu qələbə Azərbaycan–İran dövlət sərhədinin müvafiq hissəsində nəzarətin bərpasına şərait yaratdı və sonrakı hərbi əməliyyatlar üçün mühüm imkanlar açdı.
Azərbaycan Respublikasının Prezidenti İlham Əliyevin 31 iyul 2023-cü il tarixli Sərəncamı ilə işğaldan azad edilmiş ərazilər üzrə şəhər günləri təsis edildi. Həmin Sərəncama əsasən, 20 oktyabr Zəngilan şəhəri günü elan olundu. Bu qərar şəhərin azad olunmasının ildönümünün dövlət səviyyəsində qeyd edilməsi, şəhidlərimizin əziz xatirəsinin yad olunması, Zəngilanın tarixi və mədəni irsinin yaşadılması baxımından xüsusi əhəmiyyət daşıyır.
Uzun illər işğal altında qalan Zəngilan öz tarixi torpaqlarına qayıdışın, milli iradənin və sarsılmaz vətənpərvərliyin rəmzinə çevrilib. Bu gün azad edilmiş ərazilərdə aparılan bərpa və quruculuq işləri, doğma yurda qayıdış prosesi Azərbaycanın gələcəyə inamını nümayiş etdirir.
Zəngilanın azadlığı uğrunda canlarından keçən şəhidlərimizin xatirəsi xalqımızın yaddaşında daim yaşayacaq. Onların qəhrəmanlığı sayəsində bu gün Azərbaycan bayrağı doğma torpaqlarımızda dalğalanır.
20 oktyabr Zəngilan şəhəri günü təkcə qələbənin ildönümü deyil, həm də gələcək nəsillərə ötürüləcək tarixi yaddaşın, milli birliyin və Vətən sevgisinin təcəssümüdür. Zəngilanın azadlığı Azərbaycan xalqının öz torpaqlarına bağlılığının və mübarizə əzminin unudulmaz nümunəsidir.
Müəllif: Anar Mehdiyev
Göygöl RİHB-nın Dozular kənd İƏD üzrə nümayəndəsi
