23 iyun 2012-ci il tarixində “Hyatt” mehmanxanasının “Quba” zalında 26 iyun Azərbaycan Silahlı Qüvvələrinin yaranması gününə həsr olunmuş “İşğal altında” kompyuter oyununun təqdimat mərasimi keçiriləcəkdir.
Nazirliyinmətbuat xidmətindən AZXEBER.COM-a verilən məlumata görə, əsas hədəfi Şuşa şəhərini işğalçılardan azad etməkdən ibarət olan “İşğal altında” kompyuter oyunu döyüş janrında hazırlanaraq, Qarabağ müharibəsini əks etdirir. Oyunun qrafikası Qarabağın, həmçinin Şuşa şəhərinin görüntüləri üzərində qurulmuşdur.
Oyunçuların döyüş bacarığını artırmaqla yanaşı ölkəmizin tarixini də öyrənməyə imkan yaradacaq olan bu oyun gənclərin və yeniyetmələrin hərbi-vətənpərvərlik tərbiyəsinə müsbət təsir göstərəcəkdir. Kompyuter oyunu 2 il müddətinə müxtəlif universitetlərdə təhsil alan tələbələr tərəfindən hazırlanmışdır və keyfiyyətinə görə dünyaca məşhur olan döyüş oyunlarına yaxındır. “İşğal altında” kompyuter oyunu mövcud olan heç bir döyüş oyununun yenidən işlənmiş və ya modifikasiya edilmiş forması deyildir.
Oyunun rəhbəri və ideya müəllifi Azərbaycan Dövlət Neft Akademiyasının tələbəsi Fərid Haqverdiyev, musiqi tərtibatçısı isə gənc bəstəkar Aqşin Əlizadədir.
Xatırladaq ki, kompyuter oyununuwww.azdimension.comsaytından vəwww.facebook.com/AzDimensionsosial şəbəkə səhifəsindən pulsuz yükləyə bilərsiniz.
Qeyd edək ki, “İşğal altında“ kompyuter oyununun təqdimat mərasimi Azərbaycan Respublikasının Prezidenti cənab İlham Əliyevin 7 iyul 2011-ci il tarixli Sərəncamı ilə təsdiq edilmiş “Azərbaycan gəncliyi 2011-2015-ci illərdə” Dövlət Proqramının 6.2.11 bəndinin icrası məqsədi ilə Gənclər və İdman Nazirliyinin dəstəyi ilə həyata keçirilir.
