Azərbaycanın müstəqillik baxımından gənc ölkə olduğunu deyən İlham Əliyev ötən 20 ildə ölkəmizin siyasi sistem və demokratik təsisatları qura bildiyini, bir sıra Avropa təsisatlarına qəbul olunduğunu, region ölkələri ilə güclü əlaqələr qurduğunu və çox perspektivli iqtisadi inkişafa nail olduğunu qeyd edib. Prezident bütün Avropa təsisatları ilə əlaqələrin siyasi partiyalar formatında, Avropa Parlamenti-Azərbaycan, Avropa Şurası- Azərbaycan səviyyəsində inkişaf etdirməyin əhəmiyyətini önə çəkib. “Həmçinin, insanlar arasında da təmasları daha sıx etməliyik. Çünki biz özümüzü hələ də təqdim etməyə ehtiyac duyuruq. Bizi Avropanın ictimai rəyində o qədər tanımırlar. Bu, obyektiv səbəblərlə bağlıdır. 20 il o qədər də uzun dövr deyil. Buna görə bizə vaxt lazımdır.
Biz avropalı qonaqlarımızı Azərbaycana səfərə dəvət etməkdə olduqca maraqlıyıq. Burada nəinki paytaxt şəhərlə, həm də rayonlarla da tanışlıq, eləcə də uzunmüddətli tərəfdaşlıq münasibətlərinin qurulması nəzərdə tutulur. Avropa ölkələri ilə ikitərəfli əlaqələrimizə gəldikdə bizim çox yaxşı nailiyyətlərimiz var”.
Fikirlərinə davam edən prezident bildirib ki, Azərbaycanın Avropa İttifaqına üzv olan bütün ölkələrlə güclü siyasi və iqtisadi münasibətləri var. Bunun çox əhəmiyyətli olduğunu deyən İlham Əliyev qyed edib ki, NATO-nun tərəfdaşı kimi, Azərbaycan nəinki öz hərbçiləri ilə, o cümlədən daşıma marşrutları ilə Əfqanıstanda sülhməramlı əməliyyatlara töhfə verir. “NATO üçün daşımaların 1/4 hissəsindən çoxu Azərbaycan vasitəsilə həyata keçirilir. Bu, ilk növbədə bizim məramımızı nümayiş etdirir, ikincisi isə, Azərbaycan ilə Avroatlantik təsisatları arasında münasibətlərin göstəricisidir”, - deyə dövlət başçısı fikrini tamamlayıb.
