Almaniyanın Maks Plank İnstitutunun elmi jurnalı olan "Geophysics”də dərc edilən araşdırma Türkiyə üçün yaxınlaşan təhlükəyə diqqət çəkib.
AZXEBER.COM "HaberGlobal”a istinadən xəbər verir ki, Yaxın Şərq və Şərqi Aralıq dənizi bölgəsi yaxın gələcəkdə görünməmiş ekstremal hava hadisələri ilə sarsılacaq.
Məqalədə bu bölgə iqlim dəyişikliyinin mərkəzi kimi təsvir edilir və ərazidə temperatur artımı sürətinin qlobal orta göstəricidən təxminən iki dəfə yüksək olduğu vurğulanır.
Alimlər Türkiyənin də daxil olduğu bölgə ölkələrinin qarşıdakı illərdə istilik, quraqlıq, qum fırtınaları və həddindən artıq yağıntı kimi çətinliklərlə üzləşəcəyinə işarə edirlər.
Proqnozlara əsasən, bu əsrin sonuna kimi regionda temperaturun 5 dərəcəyə qədər yüksələcəyi, xüsusilə yay aylarında görünməmiş yüksək temperaturun olacağı gözlənilir.
Qeyd olunur ki, yağıntıların azalması ilə bölgədə ciddi su və qida böhranı yaranacaq və bölgədə yaşayan 400 milyon insan dağıdıcı fəlakətlə üzləşəcək.
Hesabatda iqlim böhranından Türkiyə ilə yanaşı Yunanıstan, Qətər, Suriya və Səudiyyə Ərəbistanı kimi ölkələrin də təsirlənəcəyi bildirilir. Siyasi böhranların və qarşıdurmaların yaşandığı bu bölgədə iqlim böhranı ilə mübarizə üçün ölkələrin bir araya gəlməsinin çətin olduğu da vurğulanıb.
Gülay
