Xəbər verdiyimiz kimi, Bakı-Sumqayıt qatarında yaranan sıxlıq sərnişinlərin narazılığına səbəb olub.
Sosial şəbəkələrdə yayılan görüntülərdə sərnişinlərin ayaq üstə getdiyi, boş VIP yerlərdən istifadəyə icazə verilməməsinə etiraz etdikləri görünür.
Məsələ ilə bağlı Azərbaycan Dəmir Yollarına (ADY) sorğu ünvanladıq.
Qurumdan AZXEBER.COM-a bildirilib ki, sözügedən salon Abşeron dairəvi marşrutunda hərəkət edən 9 ikimərtəbəli sərnişin qatarının yalnız 4-də mövcuddur:
"Qeyd edilən sərnişin salonu Abşeron dairəvi marşrutunda xidmət göstərən 9 ədəd ikimərtəbəli sərnişin qatarının cəmi 4-də mövcuddur. İkinci mərtəbədə yerləşən həmin salonda birinci sinif yerlərə bilet alan sərnişinlərə fərdi işıqlandırma, masalar, fırlanan oturacaqlar və digər bu kimi daha yüksək komfort və texniki imkanlar təqdim olunur”.
ADY-dən bildirilib ki, salonun şəhərətrafı qatarlarda intensiv istifadəsi texniki reqlamentə uyğun hesab edilmir:
"Sözügedən salonun gündəlik yüksək sərnişin axını olan dairəvi marşrut üzrə hərəkət edən qatarlarda intensiv istifadəsi texniki reqlamentə əsasən uyğun hesab edilmir. Həmin qatarlar hazırda həftə sonları Bakı–Qəbələ–Bakı marşrutu üzrə xəttə buraxılır. Bu reyslər üzrə müntəzəm birinci sinif xidmətinin göstərilməsi üçün salonun orijinal komfort standartları qorunur və bu səbəbdən gündəlik istifadəsi məhdudlaşdırılıb”.
Qurum boş VIP yerlərin istifadəsinin məhdudlaşdırılmasının sərnişindaşıma xidmətinin keyfiyyətinə təsir etmədiyini vurğulayıb:
"Həmin salonda cəmi 9 yer təqdim olunur. Bu, 375 oturacaqlı qatarda xüsusi fərq yaratmadığı üçün və yuxarıda qeyd olunanları nəzərə alaraq vaqonun bu hissəsinin istifadəsi şəhərətrafı qatarlarda sərnişindaşıma xidmətinin keyfiyyətinə təsir etmir”.
Fəridə Əsədzadə
