Əfran İsmayılov uzun müddətli fasilədən sonra ilk rəsmi oyununa çıxdı. Fanat.az xəbər verir ki, milli komandamızın üzvü avqust ayından sonra ilk dəfə "Qarabağ"ın formasını rəsmi oyunda geyinib.
Xatırladaq ki, Əfran avqustun 8-də Premyer Liqanın 1-ci turu çərçivəsində keçirilən "Neftçi" - "Qarabağ" oyununda zədələnmişdi. Matçın 40-cı dəqiqəsində dizindən ağır zədə alan futbolçu əməliyyat olunmuşdu. Ondan sonra nə "Qarabağ" Avropa Liqası, Premyer Liqa və Azərbaycan Kuboku, nə də milli komandamıza yardım edə bilmişdi. Bu müddətdə müalicə olunan İsmayılov "Qarabağ"ın Türkiyədəki yoldaşlıq oyunlarında meydana çıxsa da, rəsmi oyunlarda oynamamışdı.
Bu gün Qurban Qurbanov onu "Qəbələ" ilə matçın 71-ci dəqiqəsində Vüqar Nadirovun yerinə oynamaq şansı verdi. Cəmi 19 dəqiqə meydanda olan Əfran 75-ci dəqiqədə qol vurdu, 79-cu dəqiqədə sarı vərəqə aldı. Beləliklə, Əfran 6 ay və ya 192 gün sonra qol və sarı vərəqə ilə yaşıl meydanlara döndü.
