Beynəlxalq Kosmik Stansiyada (BKS) təxminən səkkiz ay fəaliyyət göstərən ekipaj Yerə uğurla qayıdıb.
CNN-nin məlumatına görə, missiyanı başa vuran "Soyuz MS-28” kosmik gəmisi Qazaxıstanın Jezkazqan şəhəri yaxınlığına eniş edib.
Ekipajın tərkibində Rusiyanın kosmonavtları Sergey Kud-Sverçkov və Sergey Mikayev, həmçinin NASA astronavtı Kristofer Uilyams yer alıb. Onlar kosmosda 241 gün keçirərək elmi tədqiqatlar və müxtəlif texniki tapşırıqları yerinə yetiriblər. Bu barədə Rusiyanın "Roskosmos” Dövlət Korporasiyası məlumat yayıb.
Enişdən sonra ekipaj tibbi müayinədən keçirilib. NASA astronavtı Kristofer Uilyamsın ABŞ-a, rusiyalı kosmonavtların isə Moskva yaxınlığındakı Ulduz şəhərciyinə yola salınacağı bildirilib.
ABŞ ilə Rusiya arasında siyasi gərginliyə baxmayaraq, Beynəlxalq Kosmik Stansiya çərçivəsində kosmik əməkdaşlıq davam edir və tərəflər birgə missiyaları həyata keçirməyi sürdürürlər.
///apa.az///
