Mübariz Aşırlı layihə çərçivəsində orta ümumtəhsil məktəblərində tədris olunan 5, 6, 7 və 8-ci sinif “Azərbaycan tarixi” dərsliklərinin araşdırılacağını, üzə çıxarılan çatışmazlıqların sistemləşdirilərək müzakirəyə çıxarılacağını söyləyib: “Həm ekspertlərin, həm ictimaiyyətin, həm də jurnalistlərin iştirakı ilə keçirilən müzakirələrdə səsləndirilən təkliflər də ümumiləşdirilərək vahid bir sənəd halında müvafiq qurumlara göndəriləcək. Eyni zamanda bu məsələlərlə bağlı vaxtaşırı KİV-in imkanlarından istifadə edərək ictimai rəyin diqqətini bu sahəyə yönəltməyə çalışacağıq”.
“Şərq”" qəzetinin baş redaktoru Akif Aşırlı layihənin bu gün üçün aktual olduğunu bildirib. Onun sözlərinə görə, milli mənəvi dəyərlərimizin qorunması, milli kimliyimizin öyrənilməsi baxımından “Azərbaycan tarixi” dərsliklərinin önəmi böyükdür və bu səbəbdən də onların qüsursuz olması lazımdır. Tarix dərsliklərimizdəki mövcud problemlərdən danışan Akif Aşırlı qeyd edib ki, dərsliklərdə bəzən tarixi faktlar kifayət qədər qəliz ifadə tərzində, orta məktəb şagirdlərinin qavramaqda aciz olduğu bir formada verilir. Baş redaktor həyata keçirilən layihədə tarixçi alimlərin iştirak edərək məsləhət və təkliflərini vermələrini zəruri sayıb: “Tarixi vəsaitlərimizin mükəmməl olması gəclərimizin ermənilərin yalançı iddialarının qarşısına tam hazırlıqlı, əsaslandırılmış tarixi faktlarla silahlanmış formada çıxmasına yardımçı olacaq”. O, tarix fənnin tədrisi zamanı yeni texnologiyalardan istifadə edilməsini də vacib hesab edib.
Azərbaycan Jurnalist Qadınlar Assosiasiyasının sədri Sevil Yusifova tarix dərsliklərimizdə müəyyən qüsurların olduğunu dilə gətirib: “Mən hətta bir dəfə Biləcəridə 11 sinfin əlaçı bir şagirdi ilə söhbət edirdim. O mənə bildirdi ki, mən indiyə qədər bilmirəm ki, hansı milli kimliyə sahibik. Bircə onu bilirəm ki, türkük. Hansı dövlətin varisi olduğumuzu, haralardan, necə gəldiyimizi dəqiq bilmirik. Çünki tarix dərsliklərimiz o qədər qarışıq yazılıb ki, adam çaş-baş qalıb. Hərəsində bir cür qələmə alınıb. Bu şagirdlərin dərsliklərə olan münasibətidir. Keçmişini öyrənmək üçün, vətəndaş kimi formalaşmağımız, milli kimliyimizi dərk etmək üçün “Azərbaycan tarixi” dərsliklərini yazanların üzərinə böyük məsuliyyət düşür. Hazırkı dərsliklər isə qaneedici deyil. Bu səbəbdən də “Müasir İnkişaf” İctimai Birliyinin layihəsi təqdir olunmalıdır ”.
