ABŞ federal hökuməti bəzi dövlət işlərinə qəbul prosesində süni intellektdən istifadə etməyə hazırlaşır.
AZXEBER.COM xarici mətbuata istinadən xəbər verir ki, yeni sistem ilk mərhələdə bütün dövlət qurumlarında tətbiq edilməyəcək. Süni intellektlə müsahibə sistemi əvvəlcə "Tech Force” proqramına müraciət edən namizədlər üzərində sınaqdan keçiriləcək. Proqram özəl sektordan texnologiya mütəxəssislərini iki il müddətinə dövlət qulluğuna cəlb etmək məqsədi daşıyır.
Təxminən 1,9 milyon nəfərin çalışdığı federal hökumət işə qəbul prosesinin ilkin mərhələsində süni intellekt texnologiyalarından istifadəni genişləndirməyi planlaşdırır.
Müsahibəni AI agentləri keçirəcək
Pilot layihə çərçivəsində namizədlər standartlaşdırılmış suallar verən süni intellekt agentləri ilə müsahibə aparacaqlar.
Müsahibələr səsli, görüntülü və ya mətn formatında keçirilə biləcək. Sistem namizədlərin cavablarını qeydə alacaq, onların transkriptini hazırlayacaq və nəticələri işə qəbul üzrə məsul şəxslər üçün ümumiləşdirəcək.
Bu prosesdə "CodeSignal” platformasından istifadə olunacaq. Platforma artıq federal IT işlərinə qəbul prosesində texniki bacarıqların qiymətləndirilməsi üçün də istifadə edilir.
Son qərarı insan verəcək
ABŞ Personel İdarəetmə Ofisi (OPM) dövlət qurumlarına işə qəbul prosesində süni intellektdən yararlanmağı tövsiyə etsə də, mühüm kadr qərarlarında insan nəzarətinin saxlanılmasını tələb edir.
ABŞ hökuməti yeni sistemlə uzun və yavaş işə qəbul prosesini sürətləndirməyi, eyni zamanda yaşlanan dövlət işçi qüvvəsinin balanslaşdırılmasını hədəfləyir.
Rəsmilər süni intellektlə aparılan müsahibələrin qarşıdakı illərdə federal dövlət qulluğuna qəbul prosesində daha geniş yayılacağını bildirirlər.
Gülay
