Bir neçə gündür ki, Afət Fərmanqızı ilə Vəfa Şərifova arasında yaşanan mahnı qalmaqalı böyüyür. Söhbət Ayaz Allahverdiyevin bəstəsi olan "Dağlar oğlu” mahnısından gedir. Qalmaqala səbəb isə Vəfa Şərifovanın Afət Fərmanqızının mahnısını icazəsiz ifa etməsi olub.
AZXEBER.COM məsələyə aydınlıq gətirmək məqsədilə Afət Fərmanqızı ilə əlaqə saxlayıb. Müğənni yaşanan qalmaqalla bağlı açıqlamasında bunları bildirib:
"Mahnı Ayaz Allahverdiyevindir. O vaxtı Vəfa bu mahnını Ayazdan icazəsiz oxuyub. Ayaz da mənə dedi ki, Vəfa mənə hörmətsizlik edib, mahnımı oğurlayıb. Ayaz məndən kömək istədi. Mən də Vəfaya zəng etdib məsələni araşdırdım. Ona dedim ki, gəl ortada halallıq olsun, heç olmasa Ayazla duet oxu. Vəfa bununla da razılaşmadı, dedi mən kişilərlə oxumuram. Amma bir həftə sonra İfratla dueti çıxdı. Ayaz dedi ki, mahnı mənimdir onu Vəfanın "Youtube" kanalından sildirəcəyəm. Vəfa isə özüm silərəm dedi və sildi də. Ayaz da mahnını mənə verdi və dedi ki, indi Vəfa mənə 100 min manat pul da versə daha mahnını ona vermərəm. Mən mahnını oxudum, klip də çəkdim. Bir də gördüm ki, Vəfa Ayazla əlbir olub mahnının icazəsini də alıb "Youtube"a qoyub".
Bütün bu olanlarda mahnının bəstəkarını günahlandıran Afət Fərmanqızı Vəfa Şərifovanın ünvanına da sərt sözlər səsləndirib:
"Baxsanız görəcəksiz ki, bu gün məşhur olan bütün müğənnilərlə Vəfa düşməndir. İstər Zeynəb olsun, İstər Türkan olsun, hamı ilə küsülüdür. Əvvəl mənim mahnımı, sonra oxuyanımı, daha sonra musiqiçimi oğurlamaq istədi, amma alınmadı. Mən necə Cabbar Musayevə deyə bilərəm ki, Könül xanımı at gəl mənimlə oxu? Axı ortada Könül xanım var. Vəfada isə bu prinsiplər yoxdur. Ondan bir şey, bundan bir şey götürə-götürə hara qədər gedəcək? Oxusun toylarda, şənliklərdə, amma mənim hələ efirdə səsləndirmədiyim mahnını necə "Youtube"a qoya bilərsən? Nə olsun ki, sən Ayazın "başını bişirib” icazəsini almısan. Məndə Ayazın bütün səs yazıları var”.
Afət Fərmanqızı Vəfa Şərifova ilə sənət meydanında da üz-üzə gəlməyə hazır olduğunu deyib:
"Vəfanın səsi yoxdur, görünüşü isə başdan ayağa əməliyyatdır. Bunları çıxardın atın kənara gör heç onu toya aparan olar? Elə özünə güvənir, gəlsin bir canlı verilişdə mənimlə duet oxusun. Gəlsin bir-iki boğaz muğam oxuyaq, aşıq havası oxuyaq, təsnif oxuyaq. Sənəti varsa gəlsin! O elə bilir ki, iki dənə meyxanaçı ilə duet oxumaqla hər şey düzəlir. O, bütün süni yaratdığı gözəllikləri çıxartdırsa, onu toya aparan olsa mən adımı dəyişəcəm. Vəfa maskalanmış, saxta insandır. Fonoqramla toy oxuyur, oğurluqla mahnı alır. Bu yolla da özünə yol tapır”.
AZXEBER.COM portalı olaraq, səslənən iddialarla bağlı müğənni Vəfa Şərifova ilə əlaqə saxlamağa çalışsaq da, müğənnidən cavab ala bilmədik. Qarşı tərəfin də mövqeyini dərc etməyə hazırıq.
Aysel Hacızadə
