AFFA İntizam Komitəsi “Neftçi”nin baş məşqçisi Böyükağa Hacıyevə sərt cəza tətbiq edib.
AZXEBER.COM-un qurumun saytına istinadən yaydığı xəbərə görə, komitənin bu gün keçirilən iclasında Topaz Premyer Liqanın XXV turunun “Neftçi” – “Qarabağ” matçında hadisələrə baxılıb.
Hər iki klubun 4 futbolçusu sarı vərəqə ilə cəzalandığı üçün klublar 1000 manat cərimə olunub. Oyunun 21, 25-ci dəqiqələrində “Qarabağ” klubu, 16, 42 və 72-ci dəqiqələrində “Neftçi” klubunun azarkeşləri tərəfindən pirotexniki vasitələr, fişənglərin istifadəsinə və meydançaya atılmasına görə hər iki klub 2000 manat cərimə olunub.
Oyunun 44-cü dəqiqəsində “Neftçi” klubunun futbolçusu İqor Mitreski sonuncu ümid foluna görə birbaşa qırmızı vərəqə alaraq meydandan kənarlaşdırıldığı üçün futbolçu 1 oyunluq cəzalanıb, klub 200 manat cərimə olunub.
Oyunun fasiləsi zamanı “Neftçi” klubunun məşqçisi Bəxtiyar Musayev meydançada hakimlərə qarşı aqressiv jestlərə görə 5 oyunluq cəzalanıb, klub 5000 manat cərimə olunub.
Mətbuat konfransında “Neftçi” klubunun baş məşqçisi Böyükağa Hacıyev AFFA və PFL əməkdaşları haqqında qeyri-etik ifadələr işlətdiyinə görə 10 oyunluq cəzalanıb, klub 20 min manat cərimə olunub.
Matç zamanı və matçdan sonra stadionda təhlükəsizlik təmin olunmadığı üçün meydan sahibi “Neftçi” klubu 5000 manat cərimə olunub.
Hər iki klubun azarkeşləri tərəfindən stadionun oturacaqları sındırıldığı üçün “Bakcell Arena” stadionunun rəhbərliyinin dəymiş zərərə uyğun olaraq klublara təqdim edəcəyi hesab əsasında ödəmə etsinlər.
İntizam Komitəsi hakimlərin idarəçiliyinə Hakimlər Komitəsində baxılmasını və İntizam Komitəsinə məlumat verməyi tapşırıb.
